မကွေးတိုင်း စလင်းမြို့နယ်အမျိုးသားဒီမိုကရေစီအဖွဲ့ချုပ်(NLD) အလုပ်အမှုဆောင် ဦးနိုင်လင်းကို စစ်ကောင် စီတပ်က ယနေ့ (စက်တင်ဘာ၁၄ရက်) မွန်းလွဲပိုင်းက ပစ်ခတ်သတ်ဖြတ်ခဲ့သည်ဟု ဒေသခံတစ်ဦးက ပြော သည်။
စလင်းမြို့နယ် ဝင်ရကျေးရွာရှိ ဦးနိုင်လင်းအိမ်ကို စစ်ကောင်စီတပ်က လာရောက်ပစ်ခတ်ခဲ့ခြင်းဖြစ်သည်။
“ဒလန်က သတင်းပေးလို့လိုက်လံပစ်ခတ်ဖမ်းဆီးတာ။ ပစ်ခတ်တော့ ကျည်ထိပြီးမှန်သွားတယ်။ မှန်ရုံတင်မကဘူး နောက်ထပ် မှန်ပြီးတာနဲ့ တောက်လျှောက်ထပ်ပစ်တာ စကာပေါက်ဖြစ်သွားသွားပြီး ဒီကနေ့ ၃နာရီခွဲလောက်မှာ ဆုံးသွားတယ်” ဟု ဒေသခံတစ်ဦးက ပြောသည်။
ဦးနိုင်လင်း၏ ရုပ်အလောင်းကို စလင်းမြို့နယ် ပြည်သူ့ဆေးရုံသို့ ပို့ဆောင်ထားကြောင်း ၎င်းက ဆိုသည်။
“အခုအချိန် သူတို့ လက်သုံးစကားက PDFနဲ့ ဆက်သွယ်တယ် NUGနဲ့ ဆက်သွယ်တယ်ပေါ့။ CRPHနဲ့ ဆက်သွယ်တယ် ဒါတွေပဲ သူတို့ ပြောမှာ။ လက်နက်ခဲယမ်းမီး ကျောက်တွေလုပ်တယ်ဆိုတဲ့အကြောင်းပြချက်နဲ့ ၀ိုင်းဝန်းဖမ်းဆီးတာပေါ့။ ဖမ်းဆီးရုံတင်မကဘူး ပစ်ခတ်ဖမ်းဆီးတာပေါ့။ သူတို့ မိုက်ရိုင်းနေတာကတော့ အထူးပြောစရာလိုတော့ပါဘူး။ အခုက ဖမ်းမိန့်တင်မကဘူး ပစ်မိန့်ပါ ပါနေတော့ သူတို့ မထင်ရင်မထင်သလို ရက်ရက်စက်စက် လူတွေကို ဖမ်းတယ်။ အိမ်တွေကို မီးရှို့တယ်။ ယူစရာရှိတာယူတယ်” ဟု ဒေသခံတစ်ဦးက ပြောသည်။
စစ်ကောင်စီတပ်အနေဖြင့် ပြည်သူလူထု၏ အပြတ် အသတ်ထောက်ခံမှုဖြင့် ရွေးကောက်ပွဲအနိုင်ရရှိထားသော NLD ပါတီမှ ထိပ်ပိုင်းခေါင်းဆောင်အများအပြားကို ဖမ်းဆီးထိန်းသိမ်းထားသကဲ့သို့ မြို့နယ်နှင့် ရပ်ကျေး ပါတီဝင်များကို ဖမ်းဆီးခြင်း၊ သတ်ဖြတ်ခြင်းများလုပ် ဆောင်နေသည်။