ဒလန်သတင်းပေးမှုကြောင့် ဒဂုံတက္ကသိုလ် ကျောင်းသားများသမဂ္ဂအဖွဲ့ဝင် ခြောက်ဦး ယမန်နေ့(စက်တင်ဘာ ၁၄)ညက ဖမ်းဆီးခံခဲ့ရကြောင်း သတင်းရရှိသည်။
ယမန်နေ့(စက်တင်ဘာ ၁၄)ည ၁၀ နာရီကျော်က ရန်ကုန်မြို့ ကျောက်တံတားမြို့နယ် ၃၉ လမ်းအပေါ်ဘလောက်(အနော်ရထာလမ်းနှင့် ဗိုလ်ချုပ်လမ်းကြား)ရှိ ဓမ္မာရုံရှေ့မှ တိုက်ခန်းသို့ စစ်ကောင်စီတပ်ဖွဲ့ဝင်များက လိပ်စာအတိအကျဖြင့် လာရောက်ဖမ်းဆီးခဲ့ခြင်းဖြစ်သည်ဟု ဒေသသတင်းရင်းမြစ်များက ဖော်ပြသည်။
ထိုသို့ လာရောက်ဖမ်းဆီးစဉ် စစ်ကားတစ်စီး၊ အိမ်စီးကားနှစ်စီးအပြင် အရပ်ဝတ်အများအပြားဖြင့် ကျောင်းသားခြောက်ဦးကို ဖမ်းဆီးခေါ်ဆောင်သွားခြင်းဖြစ်ကြောင်း မျက်မြင်တွေ့ရှိသူတစ်ဦးက ပြောသည်။
ဖမ်းဆီးခံရသူများတွင် ကျောင်းသူနှစ်ဦးနှင့် ကျောင်းသားလေးဦးဖြစ်ပြီး ၎င်းတို့မှာ မဝတ်ရည်အောင် ၊ မသဉ္ဇာဇော် ၊မောင်စည်သူအောင် ၊မောင်ရဲလင်းဦး၊ မောင်နေထက်လင်း၊ မောင်မြင့်သိန်းနိုင် တို့ဖြစ်ကြောင်း ဒဂုံတက္ကသိုလ်ကျောင်းသားများသမဂ္ဂက ယနေ့တွင် အတည်ပြုထုတ်ပြန်ထားသည်။
Public Service Announcement
ကျောင်းသားများသမဂ္ဂအဖွဲ့ဝင်များနှင့် အဖွဲ့ဝင်ဟောင်းများကို စစ်ကောင်စီကဖမ်းဆီးလျက်ရှိရာ ပြီးခဲ့သည့် စင်တင်ဘာ ၆ ရက်က ဒဂုံတက္ကသိုလ် ကျောင်းသားများသမဂ္ဂဥက္ကဋ္ဌဟောင်း ကိုမင်းသုခကိုလည်း ထောင်ဒဏ် ၁၀ နှစ်ချမှတ်ခဲ့သေးသည်။
