ရေစကြိုမြို့နယ်မှ ရေလယ်ကျွန်းကျေးရွာများသို့ အာဏာသိမ်းစစ်ကောင်စီတပ်များ ယနေ့ (စက်တင်ဘာ ၂၂ ရက်)ရောက်ရှိလာပြီး သေနတ်များပစ်ဖောက်ခြင်း၊ လက်နက်ကြီးများဖြင့်ပစ်ခတ်နေသောကြောင့် ဒေသခံများ ထွက်ပြေးနေရကြောင်း နယ်ခံများက ပြောသည်။
ယနေ့နံနက် ၁၁ နာရီခန့်က စစ်ကောင်စီတပ်များသည်မကွေးတိုင်းရှိ ရေစကြိုမြို့နယ်၊ ရေလယ်ကျွန်းကျေးရွာများသို့ ရောက်ရှိလာပြီး မိဖုရားရွာ၊နွားမော့ရွာတို့မှတဆင့် ရွာစဥ်တစ်လျှောက် လှည့်လည်စစ်ဆေးခြိမ်းခြောက်ခဲ့သည်။ ထို့နောက် မွန်းလွဲပိုင်း ၂ နာရီ ခွဲအချိန်ခန့်တွင် မီးလောင်ကျွန်းမြောက်ရွာမှ လက်နက်ကြီးများဖြင့် ပစ်ခတ်ခဲ့သည်။ လက်နက်ကြီးဖြင့်ပစ်ခတ်သောကြောင့် သာဂေါင်ရွာဟောင်းမှ နေအိမ်တစ်လုံး ပေါ်သို့ အိမ်ခေါင်မိုးဖောက်၍ ကျခဲ့ပြီး ရွာသားများ ရှောင်ပြေးနေကြသည့်အတွက် ထိခိုက်မှုမရှိကြောင်း ဒေသခံများက ပြောသည်။ သို့သော် သာဂေါင်ကျေးရွာမှ နေအိမ်ပေါ်သို့ ကျသောလက်နက်ကြီးမှာ မပေါက်ကွဲခဲ့ကြောင်းဒေသခံအချို့ကပြောသည်။
“လက်နက်ကြီးပစ်တာ မြေတွေကော အိမ်တွေပါ တုန်သွားတယ်။ လူထိခိုက်မိတာတော့ မကြားသေးဘူး။”ဟု ဒေသခံတစ်ဦးက ပြောသည်။
ထိုအပြင်ညနေပိုင်းတွင်လည်း နွားမော့ရွာသို့ရောက်ရှိလာကြပြီး စစ်ဆေးရှာဖွေခြင်း၊ သေနတ်များပစ်ဖောက်ခြင်း၊ အနီးဝန်းကျင်ရှိ ဇရပ်နီကျေးရွာဘက်သို့ လက်နက်ကြီးများသုံး၍ ပစ်ခတ်ခြင်းများ ပြုလုပ်ခဲ့ပြီး ညနေ ခြောက်နာရီဝန်းကျင်အထိ ပစ်ခတ်သံများကြားရကြောင်း ဒေသခံများက ပြောသည်။
Public Service Announcement
စက်တင်ဘာလ ၂၁ ရက်နေ့ည ၈ နာရီ ခွဲက ရေလယ်ကျွန်းရှိရွာတစ်ရွာဖြစ်သော နွားမော့ရွာမှ စစ်ကောင်စီသတင်းပေးအမျိုးသားတစ်ဦးသတ်ဖြတ်ခံရပြီးနောက် စစ်ကောင်စီတပ်များလာရောက်ခဲ့ခြင်းဖြစ်နိုင်ကြောင်း ဒေသခံများက ပြောသည်။
