အမျိုးသားညီညွတ်ရေးအစိုးရ(NUG)ကို အသိအမှတ်ပြုရေးအဆိုအား ပြင်သစ်နိုင်ငံအထက်လွှတ်တော်က ကန့်ကွက်သူမရှိဘဲ မနေ့က အတည်ပြုလိုက်တယ်လို့ ပြင်သစ်ရောက်မြန်မာအသိုင်းအဝိုင်းတွေက ပြောပါတယ်။
ပြင်သစ်အစိုးရက အမျိုးသားညီညွတ်ရေးအစိုးရကို အသိအမှတ်ပြုဖို့အတွက် အောက်လွှတ်တော် ရဲ့ အဆုံးအဖြတ်ကိုလည်း ခံယူဖို့ကျန်ရှိနေပြီး အစိုးရအဖွဲ့အတွင်းမှာလည်း ဆွေးနွေးဆောင်ရွက်ရမှာတွေ ရှိတယ်လို့ La Communauté Birmane de France ကဖော်ပြပါတယ်။
“မလွယ်ကူပေမယ့် မဖြစ်နိုင်ဘူးဆိုတာ မရှိပါဘူး” လို့ ဆက်လက်ဖော်ပြပါတယ်။
ပြင်သစ်နိုင်ငံခြားရေးဌာနက အစိုးရတွေကို လက်ခံလေ့မရှိဘဲ နိုင်ငံတွေကိုသာ လက်ခံလေ့ရှိတယ်လို့ ပြန်လည်ဖြေကြားခဲ့ပါတယ်။
Public Service Announcement
ပြင်သစ်အထက်လွှတ်တော်ရဲ့ NUG အသိအမှတ်ပြုရေးမဲခွဲပွဲကို ပြင်သစ်ရောက် မြန်မာများအဖွဲ့အစည်း CBF ဥက္ကဌ ဒေါက်တာတင်တင်ထားမြင့် ဦးဆောင်ပြီး မြန်မာတွေလည်း တက်ရောက်ခဲ့တယ်လို့ ဆိုပါတယ်။
“လွှတ်တော်မှာ ပါတီအစုံ အဆိုတင်သွင်းတာ၈ ဦးရှိတယ်။ သူတို့အဆိုတင်သွင်းအပြီးမှာ NUG ကိုအသိအမှတ်ပြု့မဲ့သူတွေလက်ထောင်ပါဆိုတော့ အားလုံးလက်ထောင်ကြတယ်။ ကန့်ကွက်မဲ့သူလက်ထောင်ဆိုတော့ တယောက်မှ မကန့်ကွက်ကြဘူး။ အဲဒီအချိန် ဝမ်းသာလွန်းလို့ မျက်ရည်ကျရတယ်”လို့ တက်ရောက်ခဲ့သူတစ်ဦးက ရေးသားထားပါတယ်။
