ရန်ကုန်မြို့ တောင်ဒဂုံမြို့နယ်ရှိ (၂၄) ရပ်ကွက်အုပ်ချုပ်ရေးမှူးရုံးအနီး ယနေ့(အောက်တိုဘာ ၆ ရက်)နံနက်က ဗုံးနှစ်လုံးပေါက်ကွဲမှုဖြစ်ရာ ရာအိမ်မှူးတစ်ဦး ဒဏ်ရာရရှိခဲ့ကြောင်း ဒေသခံများက ပြောသည်။
ရာအိမ်မှူးဖြစ်သူ ဦးစောသန်းထွန်း၏ ခြေထောက်နှင့် လက်တို့တွင် ဒဏ်ရာရရှိခဲ့ကြောင်း ရပ်ကွက်နေပြည်သူတစ်ဦးက ပြောသည်။
“ဒီမနက်အစောပိုင်းက ရပ်ကွက်အုပ်ချုပ်ရေးမှူးရုံးနားမှာ ဗုံးပေါက်တာပါ။ မသင်္ကာစရာ အိတ် တစ်ခုတွေ့တယ် ဆိုပြီး ရာအိမ်မှူးက သွားစစ်ကြည့်တဲ့အချိန် ထပေါက်တာလို့ သိရပါတယ်။ သူ့ရဲ့ လက်နဲ့ ခြေထောက်တွေမှာ ဒဏ် ရာရသွားပါတယ်”ဟု ၎င်းက ပြောသည်။
ထိုဖောက်ခွဲမှု ဖြစ်စဥ်ကို အာဏာသိမ်းဆန့်ကျင်ရေးနှင့် ပြည်သူ့လွတ်မြောက်ရေးအဖွဲ့ (ACPLF) က လုပ်ဆောင်ခြင်းဖြစ်ကြောင်း ထုတ်ပြန်ထားသည်။
စစ်ကောင်စီတပ်ဖွဲ့ဝင်များကို ဖောက်ခွဲတိုက်ခိုက်ရန် ရည်ရွယ်ထားသော်လည်း ရာအိမ်မှူး ဦးစောသန်းထွန်းက ဗုံးကို သတ်ရန်ကြိုးစားသဖြင့် ပေါက်ကွဲကာ ဒဏ်ရာရရှိခဲ့ခြင်း ဖြစ်ကြောင်း ထုတ်ပြန်ချက်တွင် ပါဝင်သည်။
စစ်ကောင်စီတပ်ဖွဲ့ဝင်များကို အဓိကတိုက်ခိုက်ရန် ရည်ရွယ်သော်လည်း ရပ်ကွက်အုပ်ချုပ်ရေးမှူး၊ ရာအိမ်မှူးများ စစ်ကောင်စီ သတင်းပေးအဖြစ် ကြားဝင်နှောင့်ယှက်ပါက ဖြစ်လာသည့်အကျိုးဆက်ကို ခံစားရမည် ဖြစ်ကြောင်း ACPLF က အသိပေးထုတ်ပြန်ထားသည်။