အကြမ်းစစ်ကောင်စီလက်အောက်ခံ ရင်းနှီးမြှပ်နှံမှုကော်မရှင်က ပြီးခဲ့သည့် ၂၀၂၀-၂၁ဘဏ္ဍာနှစ်တွင် အမေရိကန်ဒေါ်လာ ၃ ဒသမ ၇ ဘီလီယံဖိုးဝင်ရောက်ခဲ့သည်ဟု စာရင်းလိမ်ထုတ်ပြန်ထားသည်။
စစ်တပ်အာဏာသိမ်းမှုကြောင့် နိုင်ငံအတွင်း ရင်းနှီးမြှပ်နှံမှုလုပ်ငန်းများ ဝင်ရောက်မှု လုံးဝမရှိချိန်တွင် ယခုလို စာရင်းလိမ်များ ထုတ်ပြန်ထားခြင်းဖြစ်သည်။
၂၀၂၀-၂၁ဘဏ္ဍာနှစ် ပထမလေးလပတ် အရပ်သားအစိုးရတွင် အမေရိကန်ဒေါ်လာ သန်း ၆၇၀ကျော်ဝင်ရောက်ခဲ့သည်။ ၎င်းဘဏ္ဍာနှစ် ကျန် ၈လတွင် စစ်တပ်အာဏာသိမ်းခဲ့ပြီးနောက် ရင်းနှီးမြှပ်နှံမှုလုပ်ငန်းများ ဝင်ရောက်မှုမရှိသော်လည်း အကြမ်းဖက်စစ်တပ်၏ ရင်းနှီးမြှပ်နှံမှုကော်မရှင်က ရင်းနှီးမြှပ်နှံမှု ကိန်းဂဏန်းပမာဏများကို တိုးမြှင့်ထားခဲ့သည်။
အကြမ်းစစ်ကောင်စီ၏ ရင်းနှီးမြှပ်နှံမှုကော်မရှင်က ၂၀၂၁ မတ်လတွင် နိုင်ငံခြားရင်းနှီးမြှပ်နှံမှု ဒေါ်လာသန်း ၆၀၀ကျော်နှင့် ၂၀၂၁ မေလတွင် ၂ဘီလီယံခွဲ ဝင်ရောက်ခဲ့သည်ဟု ထုတ်ပြန်ထားသည်။
ထိုသို့ ကိန်းဂဏန်း ပမာဏများတိုးမြှင့် ဖော်ပြထားသော်လည်း မည်သည့်လုပ်ငန်းများ ဝင်ရောက်ခဲ့သည့်ဟု ဖော်ပြထားခြင်းမရှိပေ။ အများစုသည် စွမ်းအင်ကဏ္ဍတွင် ဝင်ရောက်ခဲ့ပြီး ဒေါ်လာ ၃ ဒသမ ၁ ဘီလီယံဝင်ရောက်သည်ဟု အကြမ်းဖျင်းဖော်ပြထားသည်။
ရင်းနှီးမြှပ်နှံမူကော်မရှင်အစည်းအဝေးကို အရပ်သားအစိုးရလက်ထက် ၂၀၂၁ ဇန်နဝါရီ ၂၉ ရက်တွင် နောက်ဆုံးကျင်းပခဲ့ပြီး ထိုနောက်ပိုင်းတွင် ကျင်းပနိုင်ခြင်းမရှိတော့ပေ။ ထိုအစည်းအဝေးက လုပ်ငန်း ၁၂ခုကို နောက်ဆုံးခွင့်ပြုခဲ့ခြင်းဖြစ်သည်။
အရပ်သားအစိုးရလက်ထက်တွင် နိုင်ငံခြားရင်းနှီးမြှပ်နှံသည် တစ်နှစ်အနည်း ဒေါ်လာ ၄ ဘီလီယံမှ အများဆုံး ၆ ဒသမ ၆ ဘီလီယံအထိဝင်ရောက်ခဲ့သည်။ မြန်မာနိုင်ငံကို နှစ်စဉ်နိုင်ငံခြားရင်းနှီးမြှပ်နှံမူ ဒေါ်လာ ၅ ဒသမ ၈ဘီလီယံဝင်ရောက်ရန် ခန့်မှန်းထားခြင်းဖြစ်သည်။