ကုလသမဂ္ဂ၏ ကိုဗစ်ကာကွယ်ဆေးပံ့ပိုးမှု အကြိမ်ကြိမ်ရွှေ့ဆိုင်းခံနေရကြောင်း အာဏာသိမ်းစစ်ကောင်စီအဖွဲ့က ယမန်နေ့တွင် ထုတ်ပြန်သည်။
ကုလ၏အစီအစဥ်ဖြစ်သော ကမ္ဘာလုံးဆိုင်ရာ ကာကွယ် ဆေးထိုးနှံရေးမဟာမိတ်အဖွဲ့ (GAVI) အနေဖြင့် ကိုဗစ်ဆေးထောက်ပံ့သည့် COVAX အစီအစဥ်မှ အခြားအဖွဲ့ဝင်နိုင်ငံများဆီသို့ လေးကြိမ်မြောက် ကာကွယ်ဆေးပေးပို့ ကူညီထားပြီးဖြစ်သော်လည်းအဖွဲ့ဝင် မြန်မာနိုင်ငံသို့ တစ်ကြိမ်မှပံ့ပိုးခြင်းမရှိဟု ဆိုသည်။
ယခုကဲသို့ ခွဲဝေမှုမရရှိခြင်းမှာ စစ်တပ်ကမတရားအာဏာသိမ်းမှု၏ အကျိုးဆက်ကြောင့်ဟု အမည်မဖော်လိုသူဆရာဝန်တစ်ဦးက သုံးသပ်ပြောကြားသည်။
စက်တင်ဘာ ၃၀ ရက်က GAVI ၊ WHO နှင့် UNICEF တို့၏မြန်မာနိုင်ငံအတွက် ခွဲတမ်းကာကွယ်ဆေးအရေအတွက် ၆ ဒသမ ၂ သန်းခွဲဝေထားသည်ဆိုသော ပူးတွဲထုတ်ပြန်ချက်မှာလည်း တစ်ခုမှ ရောက်မလာသေးဟု စစ်ကောင်စီ၏ ဗိုလ်ချုပ်ဇော်မင်းထွန်းက ပြောထားသည်။
Public Service Announcement
လက်ရှိတွင် အိန္ဒိယနိုင်ငံကနေရရှိထားသော ကာကွယ် ဆေးစုစုပေါင်း သုံးသန်းခွဲနှင့် တရုတ်နိုင်ငံကဝယ်ယူထား လှူဒါန်းထားသော ကာကွယ်ဆေး ၂၃ သန်းကျော်ရှိပြီး ယခုနှစ်အတွင်း တရုတ်နိုင်ငံမှ ကာကွယ်ဆေး ၁၄ သန်းထပ်ရမည်ဟု စစ်ကောင်စီလက်အောက်ရှိ ကျန်းမာရေးဝန်ကြီးဌာနက ကြေညာထားသည်။
မြန်မာနိုင်ငံ၌ ဇန်နဝါရီ ၂၇ ရက်မှ အောက်တိုဘာ ၄ရက်အထိ လူဦးရေ ၈ ဒသမ ၆၈သန်းကို ကိုဗစ်-၁၉ ကာ ကွယ်ဆေးထိုးနှံပြီးဖြစ်ပြီး ယင်းအနက် နှစ်ကြိမ်ထိုးပြီးသူ ၃ ဒသမ ၉၂ သန်းရှိကြောင်း စစ်ကောင်စီက ဆို သည်။
ကုလ၏ အစီအစဥ်ဖြစ်သော ကမ္ဘာလုံးဆိုင်ရာ ကာကွယ် ဆေးထိုးနှံရေးမဟာမိတ်အဖွဲ့ (GAVI) အဖွဲ့ဝင်အဖြစ် နိုင်ငံတော်၏အတိုင်ပင်ခံပုဂ္ဂိုလ်ဦးဆောင်၍ ၂၀၂၀နှစ်ကုန်ပိုင်းတွင်ပါဝင်ခဲ့ပြီး ကာကွယ်ဆေး အလျင်အမြန်ရရှိရေး ဆောင်ရွက်ခဲ့သည်။
သို့သော် NLD အစိုးရလက်ထက်ဝယ်ယူခဲ့သော အိန္ဒိယနိုင်ငံထုတ် Covidshield ကာကွယ်ဆေး သန်း၃၀မှာလည်း စစ်တပ်က အာဏာသိမ်းသည့်ဖြစ်စဥ်ကြောင့် သုံးသန်းခွဲသာ ရရှိထားသည်။
