ကရင်ပြည်နယ် လှိုင်းဘွဲမြို့နယ် ပိုင်ကျုံမြို့ နောင်မြလွဲနဲ့ ကော့အိမ်ဆိုင်ကျေးရွာကြားက နယ်ခြားစောင့်တပ် (BGF)စခန်းတစ်ခုကို အမည်မသိလက်နက်ကိုင်အဖွဲ့တစ်ခုက မနေ့ညပိုင်းက လာရောက်တိုက်ခိုက်ခဲ့ပြီး BGF ၄ ဦးသေဆုံးသွားခဲ့တယ်လို့ ဒေသခံတွေထံကနေ သိရပါတယ်။
အောက်တိုဘာ ၇ ရက်ည ၁၁ နာရီအချိန်က ပိုင်ကျုံမြို့နယ် နောင်မြလွဲကျေးရွာအနီးမှာရှိတဲ့ အမှတ် (၁၀၁၉) BGF တပ်စခန်းကို အမည်မသိလက်နက်ကိုင်အဖွဲ့က လာရောက်တိုက်ခိုက်ခဲ့ပြီး BGF ဘက်က အိမ်ထောင်သည်လင်မယား နှစ်ဦးအပြင် လေးဦးသေဆုံးသွားခဲ့တယ်လို့ ဒေသခံတစ်ဦးက ပြောပါတယ်။
“ လာပစ်တဲ့အချိန်က ည ၁၁ နာရီပေါ့။ သေတဲ့လူတွေက နောင်မြလွဲကလူတွေပဲ လေးယောက်။ BGF စစ်သားတွေပေါ့။ စစ်သားမိန်းမ တစ်ဦးပါသွားတယ်။ မိသားစုဝင်တွေပေါ။ အကုန်လာသတ်သွားတယ်။ အသေးစိတ်အခြေအနေတော့ မသိရသေးဘူ။ အခု BGF တွေ လာစစ်ဆေးနေတယ်” လို့ ဒေသခံတစ်ဦးက ပြောပါတယ်။
ဒီကနေ့မနက်မှာတော့ နောင်မြလွဲနဲ့ ကော့အိမ်ဆိုင်ကျေးရွာထဲကို နယ်ခြားစောင့်တပ် (BGF)ဘက်က ကား ၉ စီးနဲ့ ဝင်ရောက်ရှာဖွေမှုတွေ လုပ်ဆောင်နေလို့ ဒေသခံရွာသားတွေ စိုးရိမ်ကြောက်ရွံ့နေတယ်လို့ သိရပါတယ်။
Public Service Announcement
ပစ်ခတ်တိုက်ခိုက်ခံရတဲ့ BGF စခန်းဟာ နောင်မြလွဲကျေးရွာမှာ အခြေစိုက်ထားတာ သိပ်မကြာသေးပဲ အခုနောက်ပိုင်းမှာမှ ထပ်တိုးချဲ့တည်ဆောက်ထားတာဖြစ်ပြီး BGF ၁၀၁၉ လက်အောက်ခံ တပ်စခန်းတစ်ခုဖြစ်တယ်လို့ သိရပါတယ်။
