အာဏာသိမ်းတာကို လက်မခံတဲ့ရခိုင်ပြည်နယ်ဝန်ကြီးချုပ်ဦးညီပုကို စစ်ကောင်စီ ထောင် ၂ နှစ်ချ

လက်ရှိအချိန်ထိ ထောင်ချ ခံရသူ NLD ဝန်ကြီးချုပ် ၃ ဦးထိရှိလာ

ရခိုင်ပြည်နယ်ဝန်ကြီးချုပ်ဦးညီပုကို နိုင်ငံ ဆူပူအောင်လှုံဆော်တယ်ဆိုပြီး စစ်ကောင်စီက ရာဇသတ်ကြီး ပုဒ်မ ၅၀၅ (ခ) နဲ့တရားစွဲပြီး ဒီနေ့ မှာ အလုပ်ကြမ်းနဲ့ ထောင်ဒဏ် ၂ နှစ်ချလိုက်တယ်လို့ ရခိုင်ပြည်နယ်အခြေစိုက် သတင်းမီဒီယာတွေရဲ့ဖော်ပြချက်အရသိရပါတယ်။

ဒီနေ့ အောက်တိုဘာလ ၈ ရက် မနက်ပိုင်းက စစ်တွေအကျဉ်းထောင် အထူးတရားရုံးကနေ အမိန့်ချလိုက်တာပါ။

စစ်တပ်က အာဏာသိမ်းပြီးရက်ပိုင်းအကြာမှာ ဖမ်းဆီးထားတဲ့ တိုင်းနဲ့ပြည်နယ်ဝန်ကြီးချုပ် အချို့ကို ပြန်လွှတ်ပေးခဲ့ပြီး ဦးညီပုလည်းပါဝင်ခဲ့ပါတယ်။

Public Service Announcement

ဒီလိုလွတ်လာတဲ့ အခါ လူမှုကွန်ရက်ကနေ ပြည်သူတွေ ပန်ကြားတဲ့စကားပြောရာမှာ အာဏာရှင်စနစ်ကို ဆန့်ကျင်ကြောင်း မြန်မာပြည်မှာ ဒီမိုကရေစီစနစ်ထွန်းကားရမှာဖြစ်ကြောင်းနဲ့ တိုက်ပွဲဝင်နေကြတဲ့ပြည်သူတွေနဲ့အတူ ရှိနေကြောင်း ထည့်ပြောခဲ့တာပါ။

အဲဒီနောက်စစ်တပ်နဲ့ ရဲက လာရောက် ဖမ်ဆီးသွားပြီး ဆူပူအောင်လှုံဆော်တယ်ဆိုကာပုဒ်မ ၅၀၅ (ခ) နဲ့ စစ်ကောင်စီက တရားစွဲဆိုတာဖြစ်ပါတယ်။

ဒါအပြင် နှစ်ရှည်ထောင်ချ လို့ရမယ့် အဂတိပုဒ်မ ၃ မှုနဲ့လည်း ထပ်မံတရားစွဲထားတာရှိပါတယ်။

လက်ရှိအချိန်ထိစစ်ကောင်စီက ပုဒ်မ ၅၀၅ (ခ) နဲ့ ထောင်ချ ခဲ့တဲ့ NLD ဝန်ကြီးချုပ်ဟာ ၃ ဦးထိရှိလာပြီး အဲဒီသူတွေကတော့ မကွေးတိုင်းဝန်ကြီးချုပ် ဒေါက်တာအောင်မိုးညို ၊ ကရင်ပြည်နယ်ဝန်ကြီးချုပ် နန်းခင်ထွေးမြင့်နဲ့ ရခိုင်ပြည်နယ်ဝန်ကြီးချုပ် ဦးညီပုတို့ပဲဖြစ်ပါတယ်။