စစ်ကိုင်းတိုင်း ကနီမြို့နယ်တွင် ပြည်သူလူထုကို နည်းအမျိုးမျိုးဖြင့် ညှင်းပန်းနှိပ်စက်နေသည့် စစ်ကောင်စီခန့် ရပ်ကွက် ကျေးရွာအုပ်ချုပ်ရေးမှူးများ ၊ စာရေးများနှင့် အကြမ်းဖက်စစ်ကောင်စီလက်အောက်ခံ ဝန်ထမ်းများ ကိုယ့်ထိုက်နှင့်ကိုယ့်ကံသာဖြစ်ကြောင်း ပြည်သူ့ကာကွယ်ရေးတပ်ဖွဲ့(ကနီမြို့နယ်) People’s Defense Force (Kani)က သတိပေးလိုက်သည်။
အကြမ်းဖက်စစ်ကောင်စီ၏ ထောက်တိုင်များဖြစ်သည့် ရပ်ကွက်/ ကျေးရွာအုပ်ချုပ်ရေးမှူးများ ၊ ဌာနဆိုင်ရာဝန်ထမ်းများ၊ အားပေးကူညီသူများသို့နောက်ဆုံးအကြိမ် ကြိုတင်သတိပေးခြင်းဟု ရေးသားထားသည့် ကြေညာချက်အား ယနေ့( အောက်တိုဘာလ၁၃ ရက်)တွင် ကနီ PDFက ထုတ်ပြန်လိုက်ခြင်းဖြစ်သည်။
စစ်ကိုင်းတိုင်း ယင်းမာပင်ခရိုင် ကနီမြို့နယ်အတွင်းတွင် အကြမ်းဖက်စစ်ကောင်စီ ခန့်အပ်သော ရပ်ကွက်၊ ကျေးရွာအုပ်ချုပ်ရေးမှူးများ ၊ ရပ်ကွက် ၊ ကျေးရွာအုပ်စု စာရေးများသည် အကြမ်းဖက် စစ်ကောင်စီ၏ အခွန်ငွေတိုးလာရေးအတွက် အခွန်ငွေ ၊ လိုင်စင်အရပ်ရပ်ငွေ ကောက်ခံရာတွင်ပါဝင်ကူညီခြင်း ၊ အမြန်ရေယာဉ်များ၊ မော်တော်များ ၊ ကုန်ကားများကို မတရားငွေကြေးကောက်ခံရာတွင် ပါဝင်ခြင်း ၊ သစ်ပွဲစား သစ်ကုန်သည်များနှင့် ပူးပေါင်း၍ ငွေကြေးတံစိုး လက်ဆောင်များရှာဖွေပေးခြင်း ၊ နှစ်လုံး သုံးလုံး လောင်းကစား ရောင်းချသူများထံမှ ငွေကြေးတောင်းခံပေးရာတွင် ပါဝင်ခြင်း ၊ ပြည်သူလူထု၏ ကိုယ်စိတ်ပင်ပန်းအောင် ဧည့်စာရင်းစစ်ဆေးရာ ၊ နေအိမ်များသို့မတရားရှာဖွေရာတွင်ပါဝင်ခြင်း ၊ ပြည်သူလူထု၏ လုံခြုံရေးကို ချိုးဖောက်၍ အကြမ်းဖက်စစ်ကောင်စီ၏ လိုအပ်သော သတင်းအချက်အလက်နှင့် မှတ်တမ်းများ ကောက်ယူရာတွင် ပါဝင်ခြင်းများရှိကြောင်း ကျွန်ုပ်တို့တပ်ဖွဲ့က စုံစမ်းလေ့လာ သိရှိပြီးဖြစ်ကြောင်း ကနီ PDFက ပြောသည်။
အချို့သော အကြမ်းဖက်စစ်ကောင်စီ ခန့်အပ်သည့် ရပ် /ကျေးအုပ်ချုပ်ရေးမှူးများသည် ရပ်ရွာနေ ပြည်သူလူထုအား ပြည်သူနှင့်ပူးပေါင်းသည်ဟု ကြေညာပြီး ဒေသခံ ဒလန်များ ၊ ပျူစောထီးများကို အသုံးချ၍ အထက်ပါလုပ်ငန်းများ လုပ်ဆောင်ရန် အဝေးမှ စီစဉ်ညွှန်ကြား ဆောင်ရွက်နေကြောင်း ကျွန်ုပ်တို့ တပ်ဖွဲ့မှ အသေးစိတ်မှတ်တမ်းများနှင့်တကွ စုံစမ်းလေ့လာသိရှိပြီးဖြစ်ကြောင်းလည်း ဖော်ပြထားသည်။
အကြမ်းဖက်စစ်ကောင်စီ၏ လက်အောက်ခံ ကနီမြို့နယ် ဌာနဆိုင်ရာများမှ တာဝန်ရှိသူများသည် CDM ဝင်ရောက်သည့် ပြည်သူ့ဝန်ထမ်းများကို ပြည်သူ့အစိုးရလက်ထက်က
ကိုဗစ် ချေးငွေများ ပြန်လည်ပေးဆောင်ရန် အမျိုးမျိုးဖိအားပေး၍ မတရားငွေတောင်းနေသော ဌာနများ ၊ ဌာနဆိုင်ရာတာဝန်ရှိသူများ၊ ငွေတောင်းရန်အားပေးသော အကြမ်းဖက်ဝန်ထမ်းများ၏ စာရင်းကို ကျွန်ုပ်တို့တပ်ဖွဲ့မှ လေ့လာသိရှိပြီးဖြစ်ကြောင်းလည်းပါရှိသည်။
ကျွန်ုပ်တို့ တပ်ဖွဲ့အနေနှင့် အဆိုပါ ကိစ္စရပ်များကိုမလုပ်ဆောင်ရန်အကြိမ်ကြိမ် အသိပေးကြေညာခဲ့ပြီး ပြည်သူနှင့်အတူ ပူးပေါင်းရန် အချိန်ကာလတစ်ခုအထိ စောင့်ကြည့်ကြိုဆိုခဲ့ကြောင်း၊ ဤသည်ကို အခွင့်ကောင်းယူ၍ အကြမ်းဖက်စစ်ကောင်စီလက်အောက်ခံ ဌာနဆိုင်ရာတာဝန်ရှိသူများ၊ ရပ်ကွက်ကျေးရွာအုပ်ချုပ်ရေးမှူးများ ၊ စာရေးများ ၊ အားပေးကူညီသူများသည် ပြည်သူလူထုနှင့် ပြည်သူ့ဝန်ထမ်းများအပေါ် မတရားမှု့များ များစွာ ပြုလုပ်လာပြီဖြစ်ရာ အသင်တို့၏ လုပ်ရပ်အတွက် အသင်တို့ ထိုက်နှင့် အသင်တို့ ကံသာဖြစ်ကြောင်း နောက်ဆုံးအကြိမ် ကြိုတင် သတိပေးကြေညာအပ်ကြောင်းပြည်သူ့ကာကွယ်ရေးတပ်ဖွဲ့(ကနီမြို့နယ်)PDF(Kani)က သတိပေးထားခြင်းဖြစ်သည်။