သမ္မတ ဦးဝင်းမြင့်ကို ကျန်းမာရေးအကြောင်းပြချက်နဲ့ရာထူးက နှုတ်ထွက်ဖို့ စစ်တပ်ဖိအားပေးခဲ့

စစ်တပ်အာဏာသိမ်းတဲ့ဖေဖော်ဝါရီလ ၁ ရက် မနက်ပိုင်းက သမ္မတအိမ်တော်မှာ ဖြစ်ခဲ့တာတွေကို သမ္မတ ဦးဝင်းမြင့်က ဒီနေ့ တရားရုံးမှာ ထွက်ဆိုလိုက်ပါတယ်။

အဲဒီနေ့မနက်ပိုင်းကသမ္မတအခန်းထဲ ကို စစ်တပ်အရာရှိအကြီးပိုင်း ၂ ဦး ဝင်လာပြီး ကျန်းမာရေး အကြောင်းပြချက်နဲ့ သမ္မတ ရာထူးကနေ နှုတ်ထွက်ဖို့ ပြောခဲ့တဲ့အကြောင်း သမ္မတ ဦးဝင်းမြင့်က တရားရုံးမှာထွက်ဆို တယ်လို့ရှေ့နေ ဦးခင်မောင်ဇော်ဆီကသိရပါတယ်။

ဒါပေမယ့် သမ္မတ ဦးဝင်းမြင့်က သူဟာကျန်းမာရေးကောင်းမွန်တာကြောင့် အဲဒီကမ်းလှမ်းချက်ကို ငြင်းပယ်ခဲ့တယ်လို့ ပြောပါတယ်။

ဒီလို ငြင်းပယ်တာကြောင့် ထိခိုက်နစ်နာမှုရှိလာမယ်လို့ အဲဒီစစ်ဘက်အရာကြီး ၂ ဦးက သတိပေးခဲ့တယ်လို့ လည်း တရားရုံးမှာ သမ္မတ ဦးဝင်းမြင့်ရဲ့ထွက်ဆိုချက်အရသိရပါတယ်။

Public Service Announcement

ဒါပေမယ့် သမ္မတ က ကျန်းမာရေးအကြောင်းပြချက်နဲ့ ရာထူးက နှုတ်ထွက်ပေးမယ့် သဘောတူညီမှု ယူမယ့်အစားအသေခံလိုက်မယ်လို့ သတိပေးတဲ့စစ်ဘက်အရာရှိကြီးတွေကို တုံ့ပြန်ခဲ့ပါတယ်။

ဆူပူအောင်လှုံဆော်တယ်ဆိုပြီး သမ္မတကို ရာဇသတ်ကြီးပုဒ်မ ၅၀၅ (ခ)နဲ့ စွဲဆိုတဲ့အမှုကို ဒီနေ့အောက်တိုဘာလ ၁၂ ရက်က နေပြည်တော်မှာစစ်ဆေးခဲ့တာဖြစ်ပြီး အဲဒီအမှုမှာ သမ္မတ ဦးဝင်းမြင့်က သက်သေအဖြစ် ထွက်ဆိုခဲ့တာပါ။

ဖေဖော်ဝါရီလ ၁ ရက် မနက်ပိုင်းက အာဏာသိမ်းရာမှာ သမ္မတ အပါအဝင်အစိုးရအဖွဲ့ အကြီးအကဲတွေကိုစစ်တပ်က ကနဦး ဖမ်းဆီးခဲ့တာဖြစ်ပါတယ်။

အဲဒီနောက် စစ်တပ်က တင်မြှောက်ထားတဲ့ ဒုတိယ သမ္မတ ဦးမြင့်ဆွေက ကာလုံအစည်းအဝေးခေါ်ပြီး တိုင်းပြည်ကိုအရေးပေါ်အခြေအနေကြေညာခဲ့တာပဲဖြစ်ပါတယ်။