သမ္မတဦးဝင်းမြင့်နဲ့ ဒေါ်အောင်ဆန်းစုကြည်တို့ရဲ့ တရားရုံးထွက်ဆိုချက်တွေ မီဒီယာကိုထုတ်ပြန်ပြောဆိုတာတွေမလုပ်ဖို့ တရားလွှတ်တော်ရှေ့နေ ဦးခင်မောင်ဇော်ကိုစစ်ကောင်စီက ပိတ်ပင်လိုက်ပါတယ်။
ပြီးခဲ့တဲ့ရက်ပိုင်းက သမ္မတနဲ့ ဒေါ်အောင်ဆန်းစုကြည်တို့ရဲ့ ထွက်ဆိုချက်တွေ ကြောင့် အပြင်းအထန်ဝေဖန်ခံနေရတဲ့ စစ်ကောင်စီဟာ ရှေ့နေဦးခင်မောင်ဇော် ရှေ့ဆက်ဘာမှပြောဆိုလို့မရအောင် တားမြစ်လိုက်တာလည်းဖြစ်ပါတယ်။
ပြည်တွင်းပြည်ပ မီဒီယာတွေအပြင် သံတမန်တွေ ၊ အပြည်ပြည်ဆိုင်ရာအဖွဲ့အစည်းတွေ၊ INGO ၊ နိုင်ငံခြားအစိုးရတာဝန်ရှိသူတွေ နဲ့လည်း ဆက်သွယ်ပြောဆိုတာတွေမလုပ်ရဘူးလို့ စစ်ကောင်စီက စာထုတ်ထားတာတွေ့ရပါတယ်။
တရားလွှတ်တော်ရှေ့နေ ဦးခင်မောင်ဇော်ရဲ့ ဆက်သွယ်ပြောဆိုချက်တွေဟာ အများပြည်သူငြိမ်ဝပ်မူ၊ ရုန်းရင်းဆန်ခတ်မှုတွေကို ဖြစ်ပေါ်စေနိုင်တာကြောင့်လို့ စစ်ကောင်စီက စွပ်စွဲထားတာပါသေးတယ်။
Public Service Announcement
အာဏာသိမ်းတဲ့နေ့မှာကျန်းမာရေးအကြောင်းပြပြီး ရာထူးကနုတ်ထွက်ဖို့ စစ်ကောင်စီက ခြိမ်းခြောက်ခဲ့ တာကိုသမ္မတက တရားခွင်မှာထွက်ဆိုသလို ဒေါ်အောင်ဆန်းစုကြည်ကလည်း သူ့အပေါ် စွပ်စွဲချက်တွေဟာ အဓိပ္ပာယ်မရှိဘူးလို့ ရှေ့နေတွေကိုပြောခဲ့တာတွေရှိပါတယ်။
