စစ်ကောင်စီခေါင်းဆောင်ဟာ သူ့ကိုယ်တိုင်လက်ခံထားတဲ့ အာဆီယံသဘောတူညီချက်တွေကို လေးစားမှု မရှိရင် လာမယ့် ထိပ်သီးအစည်းအဝေး ကို တက်ရောက်ခွင့်ပြုမှာ မလိုလားဘူးလို့ မလေးရှားနိုင်ငံခြားရေးဝန်ကြီးက ပြောလိုက်ပါတယ်။
စင်ကာပူအခြေစိုက် CNA သတင်းဌာနရဲ့ဖော်ပြချက်အရ မလေးရှားဝန်ကြီးချုပ်ဟာ ဒီနေ့ညနေပိုင်းမှာ ပြုလုပ်မယ့် အာဆီယံနိုင်ငံခြားရေဝန်ကြီးအဆင့်အစည်းအဝေးမစတင်မီမှာ ဒီစကားကိုထုတ်ပြောလာတာပါ။
အဲဒီအစည်းအဝေးကတော့ အာဆီယံသဘောတူညီချက် ၅ ချက်ကို ဖော်ဆောင်ဖို့ပျက်ကွက်တာကြောင့် စစ်ကောင်စီခေါင်းဆောင်ကို ဒီလကုန်မှာ ကျင်းပမယ့်ထိပ်သီးအစည်းအဝေးကိုတက်ခွင့် ပြု မပြုဆွေးနွေးကြမှာဖြစ်ပါတယ်။
အာဆီယံ အထူးကိုယ်စားလှယ်ရဲ့ မြန်မာနိုင်ငံခရီးစဉ်မှာ ပျက်ပြယ်သွားပြီးနောက် ဒီအစည်းအဝေးဖြစ်ပေါ်လာတာပါ။
အာဆီယံအထူးကိုယ်စားလှယ်ဟာ မြန်မာနိုင်ငံခရီးစဉ်အတွင်း ဒေါ်အောင်ဆန်းစုကြည် နဲ့တွေ့ဆုံခွင့်ရဖို့တောင်းဆိုပေမယ့် စစ်ကောင်စီဘက်က လက်မခံတာကြောင့် ခရီးစဉ်အထမမြောက်တာလည်းဖြစ်ပါတယ်။
မြန်မာ့အရေးကို ဖြေရှင်းရာမှာ အာဆီယံအထူးကိုယ်းစားလှယ်ဟာ တွေ့သင့်တွေ့ထိုက်သူတွေနဲ့တွေ့ဆုံခွင့်ရရမယ်လို့ အာဆီယံသဘောတူညီချက်ထဲမှာလည်းပါဝင်နေပါတယ်။
မလေးရှားဝန်ကြီးချုပ်က အာဆီယံ ကိုယ်စားလှယ်ဟာ လာမယ့်အပတ်ထဲမှာ မြန်မာနိုင်ငံကိုသွားရောက်ဖို့စီစဉ်ထားတဲ့အကြောင်းပြောပါတယ်။
ဒါကြောင့် လာမယ့်ခရီးစဉ်အတွက် တောင်းဆိုထားတာကိုတွေကိုစစ်ကောင်စီဘက်က လိုက်လျောမှုရှိ မရှိ ဒီညနေမှာကျင်းပမယ့်အာဆီယံနိုင်ငံခြားရေးဝန်ကြီးများအစည်းအဝေးမှာဆွေးနွေးကြမှာပါ။
” ဒီညနေမှာ ခရီးစဉ်အတွက် အသေးစိတ်တောင်းဆိုချက်တွေကို ဆွေးနွေးမယ် “လို့ မလေးရှားနိုင်ငံခြားရေးဝန်ကြီးက ပြောပါတယ်။
” အကယ်လို့ တိုးတက်မှုမရှိရင် မြန်မာစစ်ခေါင်းဆောင် ထိပ်သီးအစည်းအဝေးတက်တာကိုမလိုလားဘူးလို့”လည်း ဆိုပါတယ်။
စစ်ကောင်စီရဲ့ နိုင်ငံခြားရေးဝန်ကြီးဌာနကတော့ ပြီးခဲ့တဲ့ ရက်ပိုင်းက အာဆီယံအထူးကိုယ်စားလှယ်နဲ့ သူတို့အကြား ခရီးစဉ်အတွက်တောင်းဆိုမှုတွေကိုအပြန်အလှန် ညှိနှိုင်း ခဲ့တာတွေရှိတယ်လို့ထုတ်ပြန်ထားပါတယ်။
မလေးရှားနိုင်ငံခြားရေးဝန်ကြီး
Photo: Reuters/Andrea Verdelli