အမျိုးသားညီညွတ်ရေးအစိုးရ(NUG) စတင်ဖွဲ့စည်းချိန်ကစလို့ လက်ရှိအချိန်အထိ ခြောက်လအတွင်း လူသားချင်းစာနာမှုအကူအညီထောက်ပံ့ငွေကျပ် ၁.၅ ဘီလီယံခန့် သုံးစွဲပြီးပြီလို့ လူသားချင်းစာနာထောက်ထားရေးနှင့် ဘေးအန္တရာယ်ဆိုင်ရာ စီမံခန့်ခွဲရေးဝန်ကြီးဌာနက ဒီနေ့(အောက်တိုဘာ၁၇)ထုတ်ပြန်ပါတယ်။
ဒီ ခြောက်လအတွင်း စစ်ဘေးရှောင် နဲ့ နေရပ်စွန့်ခွာ ပြည်သူများအတွက် ထောက်ပံ့မှု ငွေကျပ် ၅၂၃ သန်း၊ ပဋိပက္ခကာလအတွင်း စားနပ်ရိက္ခာဖူလုံရေးအတွက် ငွေကျပ် ၇၅၀ သန်း နဲ့ အခြား လူသားချင်းစာနာမှု အကူအညီများ အတွက် ငွေကျပ် ၂၀၄ သန်း ထောက်ပံ့ပေးပို့ခဲ့ပြီးဖြစ်တယ် လို့ ထုတ်ပြန်ချက်မှာ ဖော်ပြပါတယ်။
ပြည်သူ့ခုခံစစ် စတင်တဲ့ စက်တင်ဘာနဲ့ အောက်တိုဘာ အတွင်း နိုင်ငံအနှံ့အတွက် လူသားချင်းစာနာမှု အကူအညီများအတွက် စုစုပေါင်း ငွေကျပ် ၃၃၅ သန်း ထောက်ပံ့ပေးပို့ခဲ့ပြီး ဖြစ်တယ်လို့လည်း ဆိုပါတယ်။
ပြည်သူ့ခုခံတော်လှန်စစ်ကြေညာပြီးနောက်ပိုင်း စစ်ဘေးရှောင် နဲ့ နေရပ်စွန့်ခွာ ပြည်သူများအတွက် ထောက်ပံ့မှုမှာ ငွေကျပ် ၆၀သန်းခန့် ဖြစ်ပြီး လတ်တလောမှာ ထိုးစစ်ဆင်မှုကို ပိုမိုခံစားလာရတဲ့ ဒေသတွေကို ထောက် ပံ့မှုအကူအညီများ ဆက်လက်ပေးပို့နိုင်ဖို့ တတ်အား သရွေ့စီစဉ် ဆောင်ရွက်နေတယ်လို့လည်း ထုတ်ပြန်ပါတယ်။