မြန်မာစစ်တပ်ဟာ ဩစတြေးလျကာကွယ်ရေးပစ္စည်းကုမ္ပဏီ Barrett Communications ဆီကနေ နည်းဗျူဟာဆိုင်ရာရေဒီယို စက်ပစ္စည်း အစိတ်အပိုင်းတွေ ဝယ်ယူဖို့ကြိုးပမ်းနေပြီး အကြမ်းဖက်လူသတ်စစ်တပ်နဲ့မပတ်သက်ဖို့ Justice for Myanmar က တောင်းဆိုလိုက်ပါတယ်။
Barrett Communications ဟာ မြန်မာစစ်တပ်ကို ၂၀၁၇ က နောက်ဆုံးရောင်းချမှုပြုလုပ်ခဲ့ပေမယ့် PRC-2090 ရွှေ့ပြောင်းသယ်ယူရလွယ်ကူတဲ့ စစ်သုံးဆက်သွယ်ရေးပစ္စည်းတွေကို Barrett ရဲ့ ခွင့်ပြုချက်မရဘဲ တတိယကြားခံရောင်းချသူတွေက မြန်မာစစ်တပ်ကိုရောင်းချခဲ့တယ်လို့ ဆိုပါတယ်။
ဒါ့အပြင် ဩစတြေးလျ ကုမ္ပဏီတွေဖြစ်တဲ့ Codan နဲ့ RFDesign Pty Ltd တို့ဆီကလည်း ရေဒီယိုနဲ့ ဆက်စပ်ဆက်သွယ်ရေးပစ္စည်းတွေကို မြန်မာစစ်တပ်က ဝယ်ယူရရှိခဲ့တယ်လို့ Justice for Myanmar က ထုတ်ပြန်ပါတယ်။
“မြန်မာစစ်တပ်ရဲ့ ကြည်းတပ် ဆက်သွယ်ရေးနဲ့ လေတပ်စစ်ဆင်ရေးတွေအတွက် ဩစတြေးလျနည်းပညာကို အသုံးပြုနေတာကို ကျွန်မတို့ စိုးရိမ်ထိတ်လန့် စိတ်ပျက်ရပါတယ်။ မြန်မာပြည်သူတွေအပေါ် လူမျိုးတုန်း သတ်ဖြတ်မှုတွေ၊ စစ်ရာဇဝတ်မှုတွေနဲ့ လူသားမျိုးနွယ်အပေါ်ကျူးလွန်တဲ့ ရာဇဝတ်မှုတွေကို ဆယ်စုနှစ်ပေါင်းများစွာ ကျူးလွန်ခဲ့တဲ့ အပြစ်တွေကနေ အရေးယူမခံရဘဲ လွတ်နေတဲ့ မြန်မာစစ်တပ်ကို Barrett Communications က အဆင့်မြင့်နည်းပညာတွေ ထောက်ပံ့နေတာ ဆယ်စုနှစ်တစ်ခုကျော်နေပြီ ဖြစ်ပါတယ်” လို့ Justice For Myanmar ရဲ့ပြောရေးဆို ခွင့်ရှိသူ မရတနာမောင်က ပြောပါတယ်။
Public Service Announcement
ဆက်လက်ပြီး “ဩစတြေးလျ အစိုးရ အဆက်ဆက်ဟာ မြန်မာစစ်တပ်နဲ့ တပူးတွဲတွဲ လုပ်နေခဲ့ကြပြီး အခုအချိန်မှာ အာဏာသိမ်းခေါင်းဆောင်၊ စစ်ရာဇဝတ်ကောင်မင်းအောင်လှိုင်ကို စီးပွားရေးပိတ်ဆို့ အရေးယူတာမျိုးတောင် မလုပ်ပဲ ဒီအတိုင်းကြည့်နေတာက အလွန်စိတ်ပျက်အံ့ဩဖို့ကောင်းပါတယ်။ ဩစတြေးလျအနေနဲ့ စစ်လက်နက် ထိန်းချုပ်ရေးအစီအစဉ်ကို အသက်ဝင်အားကောင်းအောင် ချက်ချင်း အားစိုက်လုပ်ဆောင်ဖို့ လိုအပ်ပြီး၊ မြန်မာနိုင်ငံကို နောက်ထပ် စက်ပစ္စည်းထပ်မပို့နိုင်အောင် သေသေချာချာလုပ်ဆောင်ဖို့ လိုပါတယ်” လို့ သူမက တိုက်တွန်းပါတယ်။
Codan Ltd နဲ့ RFDesign ကုမ္ပဏီတို့ဟာ ၎င်းတို့ရဲ့ မြန်မာနိုင်ငံနဲ့ စီးပွားရေးလုပ်ငန်းတွေအကြောင်း ရှင်းပြပေးဖို့ Justice For Myanmar ရဲ့ တောင်းဆိုချက်ကို အကြောင်းပြန်ကြားခြင်း မရှိခဲ့ဘူးလို့ ဆိုပါတယ်။
