(၂)နှစ်သက်တမ်းရှိ ငွေတိုက်စာချုပ်လေးမျိုးကို ဒေါ်လာတစ်ဘီလီယံအထိ NUGအစိုးရ ရောင်းချမယ်

အမျိုးသားညီညွတ်ရေးအစိုးရ(NUG)က (၂)နှစ်သက်တမ်းရှိသည့် ငွေတိုက်စာချုပ်လေးမျိုးကို ဒေါ်လာတစ်ဘီလီယံဖိုးအထိ ရောင်းချရန်ရှိကြောင်း စီမံကိန်း၊ဘဏ္ဍာ ရေးနှင့် ရင်းနှီးမြှပ်နှံမှုဝန်ကြီးဌာန ဝန်ကြီးဦးတင်ထွန်းနိုင်က ပြောသည်။

အောက်တိုဘာ ၁၉ရက်တွင်ကျင်းပသည့် အမျိုးသားညီညွတ်ရေးအစိုးရအဖွဲ့ပုံမှန်အစည်းအဝေးတွင် ဝန်ကြီးကပြောကြားခဲ့ခြင်းဖြစ်သည်။

ငွေတိုက်စာချုပ်ဆိုသည်မှာ အစိုးရ၏ဘတ်ဂျတ်လိုငွေအတွက်အများပြည်သူထံက ချေးငွေရယူခြင်းဖြစ်သည်။ ထိုအတွက် အစိုးရကအသိအမှတ်ပြု လက်မှတ်ပြန်ပေးပြီး ထိုချေးငွေအတွက် အချိန်ကာလသတ်မှတ်ချက်အတိုင်းအတိုးနှုန်းပေးအပ်ခြင်းလည်း ဖြစ်သည်။

NUG၏ ဒေါ်လာ ၁၀၀ ၊ ဒေါ်လာ ၅၀၀ ၊ ဒေါ်လာ ၁,၀၀၀ နှင့် ဒေါ်လာ ၅,၀၀၀တန် တိုက်စာချုပ်လေးမျိုးကို ရောင်းချမည်ဖြစ်ပြီး တော်လှန်ရေးကာလအထူးငွေတိုက်စာချုပ်များဟု အမည်ပေးထားသည်။

Public Service Announcement

ငွေတိုက်စာချုပ်များကို နိုင်ငံပြင်ပရောက်ဘဏ်များဖြင့် ချိတ်ဆက်ဝယ်ယူနိုင်မည်ဖြစ်ပြီး ပြည်တွင်းက ဝယ်ယူလိုသူများကလည်း နိုင်ငံခြားဘဏ်အကောင့်ရှိသူများချိတ်ဆက်ဝယ်ယူရမည် ဖြစ်သည်။

ငွေတိုက်စာချုပ်ရောင်းချမူကို အောက်တိုဘာကုန်ပိုင်းတွင် စတင်မိတ်ဆက်မည်ဖြစ်ပြီး NUG၏ ဘတ်ဂျတ်လိုငွေအတွက် အနည်းဆုံး ဒေါ်လာသန်း ၅၀၀မှ သန်း၁,၀၀၀ (တစ်ဘီလီယံ)အထိ ရောင်းချသွားမည်ဟု NUGက ဆိုထားသည်။

သက်တမ်းကို (၂)နှစ်သတ်မှတ်ထားသော်လည်း တော် လှန်ရေးပြီးဆုံးမူအပေါ်တွင် မူတည်နေသည်ဟု NUG ဝန်ကြီး ဦးတင်ထွန်းနိုင်က ပြောသည်။

စစ်တပ်က နိုင်ငံတော်အာဏာကိုသိမ်းယူပြီးနောက် ငွေတိုက်စာချုပ်နှင့်ငွေတိုက်လက်မှတ်များကို ထုတ်ရောင်းရန် အကြိမ်ကြိမ်ကြိုးစားခဲ့သော်လည်း ဝယ်ယူသူမရှိခဲ့ပေ။