မြန်မာစစ်တပ်နဲ့ပတ်သက်မှုကြောင့် နိုင်ငံတကာဥပဒေအရတာဝန်ရှိပြီး လျှော်ကြေးပေးအပ်ဖို့လည်းတာဝန်ရှိနိုင်တယ်လို့ စင်ကာပူကို နိုင်ငံတကာရှေ့နေတစ်ဦး သတိပေး

မြန်မာစစ်တပ်ကို စင်ကာပူစတော့အိတ်ချိန်းစာရင်းဝင်ကုမ္ပဏီတွေရဲ့ ငွေပေးချေမှုတွေကြောင့် ဖြစ်ပေါ်စေခဲ့တဲ့ ထိခိုက်နစ်နာမှုတွေအတွက် စင်ကာပူဟာ နိုင်ငံတကာ ဥပဒေအရတာဝန်ရှိနိုင်ပြီး လျော်ကြေးပေးအပ်ဖို့လည်း တာဝန်ရှိနိုင်တယ်လို့ အထင်ကရနိုင်ငံတကာရှေ့နေတစ်ဦးက ပြောပါတယ်။

နိုင်ငံတကာဥပဒေပညာရှင် နှစ်ဦးရေးသားတဲ့ ဥပဒေရေးရာမှတ်စုမှာ Emerging Towns & Cities Singapore(ETC)ရဲ့ စင်ကာပူစတော့အိတ်ချိန်းစာရင်းမှာပါရှိမှုကို အဓိကထားလေ့လာခဲ့ပြီး ETCဟာ မြန်မာစစ်တပ်နဲ့ Golden City Complex တည်ဆောက်ဖော်ဆောင်နေသူဖြစ်တယ်လို့ Justice for Myanmar က ထုတ်ပြန်ပါတယ်။

“ဒီဥပဒေရေးရာမှတ်စုက စင်ကာပူစတော့အိတ်ချိန်းနဲ့ စင်ကာပူအစိုးရတို့အတွက် အရေးတကြီး မေးခွန်းများ မေးမြန်းထားပါတယ်။ ဒီမှတ်စုက ထောက်ပြခဲ့သလို စင်ကာပူနိုင်ငံက မြန်မာနိုင်ငံမှာ အကြီးဆုံးနိုင်ငံခြားရင်းနှီးမြှုပ်နှံသူဖြစ်ပါတယ်။ ETC ကုမ္ပဏီဆိုတာ မြန်မာစစ်ကောင်စီနဲ့ ၎င်းတို့ စီးပွားရေးလုပ်ငန်းစုကြီးတွေနဲ့ စီးပွားရေးဆက်နွယ်မှုရှိကြတဲ့ စင်ကာပူကုမ္ပဏီပေါင်း မြောက်များစွာထဲက တစ်ခုသာ ဖြစ်ပါတယ်”လို့ Justice for Myanmar ပြောရေးဆိုခွင့်ရှိသူ မရတနာမောင်က ပြောပါတယ်။

မြန်မာစစ်တပ်ကို ETC ရဲ့ ငွေကြေးပေးချေမှုတွေ ရပ်တန့်ပေးဖို့ စင်ကာပူစတော့ အိတ်ချိန်းနဲ့ စင်ကာပူငွေကြေးအာဏာပိုင်အဖွဲ့တို့ကို မေတ္တာရပ်ခံ တောင်းဆိုကြောင်း Justice for Myanmarက ထုတ်ပြန်ပါတယ်။

Public Service Announcement

“စင်ကာပူ အစိုးရအနေနဲ့ မြန်မာစစ်တပ်ရဲ့ ရာဇဝတ်မှုတွေနဲ့ ငြှိစွန်းနေတဲ့ စီးပွားရေးလုပ်ငန်းတွေ အခြေချလုပ်ကိုင်ဖို့ သူတိုရဲ့ နိုင်ငံ့ပိုင်နက်ကို အသုံးပြုနေတာကို မဖြစ်မနေ ရပ်တန့်ဖို့ လိုအပ်ပါတယ်” လို့ မရတနာမောင်က ဆက်ပြောပါတယ်။