မကွေးတိုင်း၊ ဂန့်ဂေါခရိုင်၊ ဆောမြို့နယ်၊ ကျောက်ထုနယ်မြေရဲစခန်းမှ ရဲတပ်သားတစ်ဦး CDMပြုလုပ်၍ ပြည်သူ့ရင်ခွင်ခိုလှုံလာသောကြောင့် လွတ်မြောက်နယ်မြေသို့ ပို့ဆောင်ပေးခဲ့ကြောင်း Yaw Defence Force (Saw & Kyaukhtu)က ထုတ်ပြန်သည်။
မကွေးတိုင်း၊ ဂန့်ဂေါခရိုင်၊ ဆောမြို့နယ်၊ ကျောက်ထုနယ်မြေရဲစခန်းမှ ကိုယ်ပိုင်အမှတ် လ/၂၆၀၈၄၃ ရဲတပ်သား ကိုကောင်းထက်ကျော်သည် အောက်တိုဘာလ ၂၁ ရက်နေ့ ည ၉ နာရီအချိန်တွင် တာဝန်မှရပ်နားပြီး CDM ဝန်ထမ်းအဖြစ် ပြည်သူ့ရင်ခွင်သို့ ဝင်ရောက်လာသောကြောင့် ကောင်းမွန်စွာ ကျွေးမွေးစောင့်ရှောက်ထားပြီး အောက်တိုဘာလ ၂၃ ရက်နေ့တွင် လွတ်မြောက်နယ်မြေသို့ ပို့ဆောင်ပေးခဲ့ကြောင်းYDF (ဆော& ကျောက်ထု)က အသိပေးသည်။
နောက်နောင်တွင် စစ်လက်နက်အပြည့်အစုံ (Full Equipment)နှင့်တကွ YDF (ဆော & ကျောက်ထု) အဖွဲ့ထံ ဝင်ရောက်လာပါက ထိုက်တန်သောဆုကြေးငွေကို ပေးအပ်၍ ယခုလို လွတ်မြောက်နယ်မြေ(သို့) ပြည်ပနိုင်ငံသို့ ရောက်ရှိအောင် ပို့ဆောင်ပေးသွားမည်ဖြစ်ကြောင်းလည်းကြေညာထားသည်။
အောက်တိုဘာလ ၁၆ ရက်နေ့ကလည်း ဆောမြို့နယ်၊ လောင်းရှည်မြို့မရဲစခန်းမှ ကိုယ်ပိုင်အမှတ် လ/၂၅၈၃၈၇ ရဲတပ်သား ကိုကျော်သီဟသည် တာဝန်မှရပ်နားပြီး CDM ဝင်ရောက်လာသောကြောင့် YDFက အောက်တိုဘာလ ၂၁ ရက်နေ့တွင် လွတ်မြောက်နယ်မြေသို့ ရောက်ရှိအောင် ပို့ဆောင်ပေးခဲ့သည်။
Public Service Announcement
စစ်တပ်အာဏာသိမ်းပြီးနောက်ပိုင်း တပ်မတော်သားနှင့် ရဲတပ်ဖွဲ့ဝင်များလည်း ပြည်သူ့ရင်ခွင်ခိုလှုံကာ CDM လှုပ်ရှားမှုတွင်ဆက်တိုက်ပါဝင်လာသည်။
စက်တင်ဘာလ ၇ ရက်နေ့က အမျိုးသားညီညွတ်ရေးအစိုးရ NUGမှ အကြမ်းဖက်စစ်ကောင်စီအား ပြန်လည်ခုခံတိုက်ခိုက်ရန်ကြေညာပြီးနောက် စက်တင်ဘာလမှ အောက်တိုဘာလ ၇ ရက်နေ့ အထိ ကာလအတွင်း တပ်မတော်သား ၄၂၉ ဦးနှင့် ရဲ ၃၃၄ ဦး တို့ CDMဝင်ရန်ဆက်သွယ်ခဲ့ကြကြောင်း NUG၏ ကာကွယ်ရေးဝန်ကြီးဌာနက အသိပေးထားသည်။
