ရှမ်းတိုင်းရင်းသားများဒီမိုကရေစီအဖွဲ့ချုပ်ပါတီ (SNLD)၏ အောက်တိုဘာ ၂၆ရက်တွင် ကျရောက်သည့် ပါတီထူထောင်ခြင်း (၃၃)နှစ် မြောက်နှစ်ပတ်လည်နေ့သို့ အမျိုးသားညီညွတ်ရေးအစိုးရ (NUG)ယာယီသမ္မတဒူဝါလရှီးလက သဝဏ်လွှာပေးပို့ခဲ့သည်။
မြန်မာနိုင်ငံတွင် စစ်အာဏာရှင်စနစ် အမြစ်ပြတ်ကျဆုံးရေးနှင့် ဒီမိုကရေစီစနစ် ထွန်းကားလာ ရေးအတွက်သာမက နှစ်ပေါင်း(၆၀)ကျော်ကြာ ပြည်တွင်းရေးပဋိပက္ခကို အဆုံးသတ်စေမည့် ဖက်ဒရယ်ဒီမိုကရေစီစနစ်ထွန်းကားလာရေးအတွက် တစိုက်မတ်မတ်ရပ်တည်ဆောင်ရွက်နေသည့် SNLD၏ နှစ်ပတ်လည်နေ့အား ယာယီသမ္မတမှ ဝမ်းမြောက်စွာဖြင့် ဂုဏ်ပြုသည်ဟု ဖော်ပြထားသည်။
ပါတီနှစ်ပတ်လည်နေ့သို့ မည်သည့်အဖွဲ့၊ မည်သည့်ပုဂ္ဂိုလ်က သဝဏ်လွှာပို့ပို့ ကြိုဆိုရမည်ဖြစ်ကြောင်း SNLD ပါတီတာဝန်ရှိသူတစ်ဦးကပြောသည်။
စစ်အာဏာရှင်တိုက်ဖျက်ရေးနှင့်ဖက်ဒရယ်ပြည်ထောင်စုတည်ထောင်ရေး ဆောင်ရွက်ရာတွင် ရည်မှန်းချက်ချင်းတူ၍ အမျိုးသားညီညွတ်ရေးအစိုးရနှင့် SNLD အကြား သင့်တော်သည့် အချိန်တွင် တွေ့ဖြစ်လိမ့်မည်ဟု မျှော်လင့်ကြောင်း ပါတီ ပြောရေးဆိုခွင့်ရှိသူ ဦးစိုင်းလိတ်က ပြောသည်။
Public Service Announcement
“ ခရီးတူတယ်။ သွားပုံသွားနည်းမတူတဲ့အခါကျတော့ တစ်ချိန်မဟုတ် တစ်ချိန် လမ်းမှာတွေ့မှာပဲဗျ”ဟု ဦးစိုင်းလိတ်က ပြောကြားသည်။
SNLDပါတီသည် ၂၀၂၀ ရွေးကောက်ပွဲတွင် တတိယမဲအများဆုံးအနိုင်ရရှိခဲ့သည့် နိုင်ငံရေးပါတီဖြစ်သည်။
