စစ်ကောင်စီက လုံခြုံရေးအကြောင်းပြ၍ ရန်ကုန်မြို့မှ ကျူးကျော်တဲများကို အင်အားသုံးဖယ်ရှားနေ

လုံခြုံရေးနှင့် ငြိမ်းဝပ်ပိပြားရေးကိုထိခိုက်သည်ဟုဆိုကာ ရန်ကုန်မြို့ရှိ ကျူးကျော်တဲအများစုကို အကြမ်းဖက်စစ်ကောင်စီ၏ အမိန့်ဖြင့် ယနေ့ (အောက်တိုဘာ ၂၈ ရက်)တွင် အင်အားသုံး၍ထယ်ရှားနေသည်။

ထိုသို့ဖယ်ရှားရန်အတွက် ရန်ကုန်တိုင်းအစိုးရရုံး၌ အောက်တိုဘာ ၁၄ရက်က အစည်းအဝေးပြုလုပ်ခဲ့ပြီး အောက်တိုဘာ ၂၅ရက်တွင် ကျူးများကိုဖယ်ရှားရန် အမိန့် ညွှန်ကြားစာထုတ်ခဲ့သည်။

ယနေ့ နံနက်မှစ၍ လှိုင်သာယာမြို့နယ် ရန်ကုန်-ပုသိမ် လမ်းမကြီးဘေး ဘယ်ညာရှိ ကျူးကျော်နေအိမ်များအား ဖြိုဖျက်နေပြီး ဘူဒိုဇာကားများ၊ အထိကရုဏ်းနိုင်နင်းရေးကားများ၊ အချုပ်ကား၊ စစ်ကားများနှင့် ရဲကား၊ စည်ပင်ကားများလည်းအမြောက်အများပါဝင်သည်။ကျူးကျော်တဲများတွငွနေထိုင်သူအများစုမှာ မြို့ထဲတွင် အိမ်ငှားနေထိုင်ရန် မတက်နိုင်သဖြင့်ဖြစ်သလို တဲထိုးနေထိုင်ကြခြင်းဖြစ်သည်။

အလားတူ သန်လျင်မြို့နယ် ဒဂုံ-သီလဝါလမ်း လမ်းဘေးရှိ ကျူးကျော် တဲများ(အရပ်အခေါ် ငါးခြောက် တန်း)ကိုလည်း အာဏာသိမ်းစစ်ကောင်စီ ကဖယ်ရှားခဲ့သည်။

Public Service Announcement

အဆိုပါ ကျူးကျော်တဲများကြောင့် ပြည်သူများစိတ်အနှောက်အယှက်ဖြစ်ရပြီး ၊ကျန်းမားရေး နှင့်လုံခြုံရေးကို ထိခိုက်စေပြီး ငြိမ်ဝပ်ပိပြားရေးကိုထိခိုက်စေသည်ဟု အာဏာသိမ်းစစ်ကောင်စီက အကြောင်းပြသည်။

“ဒုက္ခတွေလည်း မျိုးစုံ ပါပဲ။ဘယ်နေရာ သွားနေလို့ နေရမှန်းမသိ။မနေ့တနေ့က မှ လာပြောတယ်။ဒီနေ့ လာဖျက်ကြတယ်။ဘယ်နား ထပ်သွားနေရမှာလဲ လမ်းဘေး အိပ်ရမှာလား”ဟု လှိုင်သာယာမှ ကျူးကျော်တဲဖျက်ဆီးခံခဲ့ရသူ တစ်ဦးက ပြောသည်။

အရပ်သားအစိုးရ လက်ထက်တွင်မူ ရန်ကုန်ရှိ ကျူး ပြဿနာကို ဖြေရှင်းရန်လစဥ် ငွေကျပ် သောင်းဂဏန်း ဝန်းကျင်ပေးသွင်းရသည့် တန်ဖိုးနည်းလုံးချင်းအိမ်စီမံကိန်းကို အကောင်အထည်ဖော်ပြီး ရာနှင့်ချီသောမိသားစုများကို နေရာချပေးခဲ့သည်။