စစ်ကိုင်းတိုင်း မုံရွာမြို့တွင် ယမန်နေ့က ကမ္ဘောဇဘဏ်ကို အနောက်မြောက်လွင်ပြင်တော်လှန်ရေးအင်အားစုက သတိပေး ဗုံးခွဲတိုက်ခိုက်ခဲ့ကြောင်း
အဆိုပါအဖွဲ့က အသိပေးသည်။
ယမန်နေ့(အောက်တိုဘာလ ၃ဝရက်) နံနက် ၁၁နာရီက မုံရွာမြို့ ပေ(၈၀)လမ်းနှင့် ကျောက္ကာလမ်းဆုံရှိ ကမ္ဘောဇဘဏ်ခွဲအား ဖောက်ခွဲသတိပေးခဲ့ကြောင်း၊ ကမ္ဘောဇဘဏ်သည် ပြည်သူလူထု၏ ယုံကြည်မှုကိုအလွဲသုံးစားလုပ်၍ ပြည်သူများ၏ ဘဏ်အကောင့်များနှင့်Kpay အကောင့်များအသုံးပြုမှုပိတ်ပင်ခြင်း၊ အသုံးပြုသူများ၏ ကိုယ်ရေးအချက်အလက်များကို စစ်ကောင်စီသို့ ပေးခြင်း စသည့် ပြည်သူလူထုနှင့်ဆန့်ကျင်သောလုပ်ရပ်များ ပြုလုပ်ထားသည့်အတွက် သတိပေးဖောက်ခွဲခဲ့ခြင်းဖြစ်ကြောင်း ၊အဆိုပါလုပ်ရပ်များကို ရပ်တန်းကမရပ်ပါက ကမ္ဘောဇဘဏ် တာဝန်ရှိသူများနှင့် ဝန်ထမ်းများ၏ အသက်အန္တရာယ် ၎င်းတို့၏ပိုင်ဆိုင်မှုများ၏လုံခြုံရေးကို အာမမခံနိုင်ကြောင်း သတိပေးထားသည်။
အောက်တိုဘာ ၂၇ ရက်ကလည်း မန္တလေးမြို့ရှိ ကမ္ဘောဇဘဏ်ခွဲများနှင့် ATMစက်များ နေရာ ၈နေရာထက်မနည်း ပေါက်ကွဲမှုများဖြစ်ပွားခဲ့သည်။
