ဖျားနာနေပေမယ့် မန္တလေးတိုင်းဝန်ကြီးချုပ် ဒေါက်တာဇော်မြင့်မောင်ကို ဒီနေ့မှာ ရုံးထုတ်စစ်ဆေးခဲ့တယ်လို့ ရှေ့နေတွေဆီကသိရပါတယ်။
ဒီနေ့ နိုဝင်ဘာလ ၁ ရက် ရုံးချိန်းမှာ ရာဇသတ်ကြီး ပုဒ်မ ၅၀၅ (ခ) ၊ သဘာဝဘေးအန္တရာယ်စီမံခန့်မှုဆိုင်ရာပုဒ်မ ၂၅/၃၀(က) တို့နဲ့စွဲဆိုထားတဲ့ အမှုတွေကို စစ်ဆေးခဲ့တာပါ။
“သူက ဒီကနေ့ ရုံးချိန်းမှာ ဖျားနေတာ။ မနေ့ညက နည်းနည်း အဖျားဝင်သွားတယ်ပြောတယ်။ ဒီနေ့စစ်နေရင်းနဲ့ ဖျားလာပြီး ချွေးတွေတအားထွက်လာတာ”လို့ ဒေါက်တာဇော်မြင့်မောင်ရဲ့ရှေ့နေ တစ်ဦးကပြောပါတယ်။
ဒေါက်တာဇော်မြင့်မောင်ဟာ ဝန်ကြီးချုပ်တာဝန်ထမ်းဆောင်နေချိန် ၂၀၁၉ ခုနှစ်ကစတင်ပြီး သွေးကင်ဆာရောဂါ နဲ့ ထိုင်းနိုင်ငံကိုသွားရောက်ကာ ဆေးကုသမှုခံယူခဲ့ရသူဖြစ်ပါတယ်။
Public Service Announcement
ဒါအပြင် အာဏာသိမ်းစစ်ကောင်စီရဲ့ ဖမ်းဆီးခံရချိန်အတွင်း မန္တလေး ၊ အိုးဘိုထောင်ထဲမှာ ကိုဗစ်ကူးစက်ခံရလို့ မန္တလေးဆေးရုံကြီးမှာ တက်ရောက်ကုသမှုခံယူခဲ့ရပါသေးတယ်။
လက်ရှိမှာတော့ ဒေါက်တာဇော်မြင့်မောင်ကို နိုင်ငံဆူပူအောင်လှုံဆော်မှု ၊ သဘာဝဘေးပုဒ်မ တွေအပြင် အဂတိပုဒ်မတွေနဲ့ပါ စွပ်စွဲပြီး စစ်ကောင်စီက ဖမ်းဆီးတရားစွဲဆိုထားတာဖြစ်ပါတယ်။
