အရေးကြီးတဲ့ကူးစက်ရောဂါများတိုက်ဖျက်ရေး မဆောင်ရွက်နိုင်အောင် အကြမ်းဖက်စစ်ကောင်စီ ပစ်မှတ်ထားလုပ်ဆောင်နေတယ်လို့ NUG ထုတ်ပြန်

‐အချိန်မီထိရောက်စွာ အရေးယူဆောင်ရွက်ကြဖို့ နိုင်ငံတကာအသိုင်းအဝိုင်းကို တိုက်တွန်း

COVID-19 အပါအဝင် အရေးကြီးတဲ့ကူးစက်ရောဂါများတိုက်ဖျက်ရေးလုပ်ငန်းတွေ မဆောင်ရွက်နိုင်ရေး အကြမ်းဖက်စစ်ကောင်စီက ပစ်မှတ်ထား ခြိမ်းခြောက်ခြင်း၊ အသက်အန္တရာယ် ရန်ရှာခြင်းလုပ်ဆောင်နေတယ်လို့ NUG ကျန်းမာရေးဝန်ကြီးဌာနက ထုတ်ပြန်ပါတယ်။

ပြည်သူလူထုကို ကျန်းမာရေးစောင့်ရှောက်မှုပေးနေသူများနဲ့ ဆေးရုံ၊ ဆေးခန်းများကို အကြမ်းဖက်စစ်ကောင်စီက ပစ်မှတ်ထား ခြိမ်းခြောက်ခြင်း၊ တိုက်ခိုက်ခြင်းများအပေါ် ပြင်းထန်စွာရှုံ့ချကြောင်းနဲ့ အဲဒီအကြမ်းဖက်လုပ်ရပ်များကို နိုင်ငံတကာအသိုင်းအဝိုင်းက အချိန်မီထိရောက်စွာ အရေးယူဆောင်ရွက်ကြဖို့ တိုက်တွန်းကြောင်း NUGက ထုတ်ပြန်ပါတယ်။

COVID-19 ရောဂါ ကာကွယ်ထိန်းချုပ် ကုသရေး၊ ခုခံအားကျဆင်းမှုကူးစက်ရောဂါ (HIV/AIDS) တိုက်ဖျက်ရေး၊ တီဘီရောဂါ (Tuber-culosis) တိုက်ဖျက်ရေး၊ ငှက်ဖျားရောဂါ (Malaria) တိုက်ဖျက်ရေး စတဲ့ လုပ်ငန်းများကို ဆောင်ရွက်နေကြတဲ့ ပြည်တွင်းပြည်ပ အဖွဲ့အစည်းများ၊ လူပုဂ္ဂိုလ်များကို လုပ်ငန်း ဆက်လက်လုပ်ဆောင်နိုင်ခြင်း မရှိစေဖို့ စစ်ကောင်စီက ခြိမ်းခြောက်ခြင်း၊ အသက်အန္တရာယ် ရန်ရှာခြင်းများ ပြုလုပ်နေတာကို သက်သေအထောက်အထားများနဲ့တကွသိရှိရတယ်လို့ NUG က ဆိုပါတယ်။

Public Service Announcement

အကြမ်းဖက်စစ်ကောင်စီဟာ ပြည်သူလူထုရဲ့ ကျန်းမာရေးလိုအပ်ချက်များအပေါ် ခုတုံး လုပ်ကာ နိုင်ငံရေးအရ အမြတ်ထုတ်ဖို့ ကြံစည်ဆောင်ရွက်နေပြီး အပြစ်မဲ့ ကျန်းမာရေး စောင့်ရှောက်မှုပေးသူများနဲ့ ပရဟိတစေတနာ့ဝန်ထမ်းများကို ဖမ်းဆီးသတ်ဖြတ်နေတယ်လို့လည်း NUG က ထုတ်ပြန်ပါတယ်။

အကြမ်းဖက်စစ်ကောင်စီရဲ့ အဲဒီလုပ်ရပ်တွေဟာ အမျိုးသားညီညွတ်ရေးအစိုးရ NUG နဲ့ တော်လှန်ရေးအင်အားစုတွေ အပေါ် အထင်မြင်လွဲမှားစေဖို့ ပြုမူဆောင်ရွက်နေခြင်းဖြစ်တယ်လို့ ထုတ်ပြန်ချက်မှာ ဖော်ပြပါတယ်။