အာဏာသိမ်းစစ်ကောင်စီက အပြစ်မဲ့ပြည်သူများကိုဖမ်းကာ တိုက်ပွဲများအတွင်း လူသားဒိုင်းအဖြစ် အသုံးပြုလေ့ရှိသဖြင့် စစ်ရေးတင်းမာနေသော ယောဒေသနှင့် စစ်ကိုင်းတိုင်းဆက်သွယ်ထားသော လမ်းပိုင်းလေးခုတွင် နိုဝင်ဘာ ၂၁ ရက်အထိ ခရီးသွားလာခြင်းမပြုရန် ယောဒေသပြည်သူ့ကာကွယ်ရေးတပ်(YDF)က မေတ္တာရပ်ခံထားသည်။
လက်ရှိတင်းမာနေသော စစ်ရေးအခြေအနေများအရ ပုလဲ-ကျော-ဂန့်ဂေါ-ကလေးလမ်း၊ပုလဲ-ကျော-ဂန့်ဂေါ-ဟားခါးလမ်း၊ပေါက်-ထီးလင်း-မင်းတပ်လမ်း၊ပေါက်-ကျောက်ထု-မင်းတပ်လမ်း၊ ဂန့်ဂေါ၊ ထီးလင်း၊ ကျော၊ ကျောက်ထု၊ ဆော လမ်းပိုင်းများ တွင် စစ်ကောင်စီဘက်မှ ထိုးစစ်ဆင်လာနိုင်သဖြင့် (၁၄.၁၁.၂၀၂၁) ရက်နေ့မှ (၂၁.၁၁.၂၀၂၁) ရက်နေ့အထိ တစ်ပတ်အတွင်း လုံးဝ(လုံးဝ) ခရီးသွားလာခြင်း မပြုလုပ်ကြပါရန် အသိပေးကြေညာအပ်ပါသည်ဟု ယော PDFက ယနေ့(နိုဝင်ဘာ ၁၄ရက်)ညတွင်ထုတ်ပြန်ခြင်းဖြစ်သည်။
စစ်ကောင်စီက အောက်တန်းကျသောနည်းလမ်းသုံးကာ အပြစ်မဲ့ပြည်သူများကို တိုက်ပွဲများအတွင်း လူသားဒိုင်းကာ အသုံးပြုဆောင်ရွက်ခြင်းများပြုလုပ်လေ့ရှိသဖြင့် မိဘပြည်သူများ သတိဝီရိယ နှင့် ဂရုတစိုက်သွားလာနေထိုင်ကြရန်လည်း အသိပေးအပ်ပါကြောင်း ထုတ်ပြန်ထားသည်။
ယောဒေသပြည်သူ့ကာကွယ်ရေးတပ်(Yaw DefenseForce_YDFသည် စစ်ကောင်စီအား တိုက်ထုတ်နိုင်ရေးအတွက် ဒေသချင်းထိစပ်နေသည့် ချင်းပြည်သူကာကွယ်ရေးတပ်မှ ဟားခါး CDFနှင့် မဟာမိတ်ပြုလုပ်ထားသည်။
Public Service Announcement
