ဒေါ်ခင်ကြည်ဖောင်ဒေးရှင်းမြေနေရာနဲ့ပတ်သက်ပြီး အဂတိပုဒ်မနဲ့ စစ်ကောင်စီက နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည် ကို စွဲဆိုထားတဲ့အမှု ဒီနေ့ စစ်ဆေးခဲ့ပါတယ်။
ဒီအမှုမှာစွပ်စွဲခံရသူတွေဖြစ်တဲ့ ဒေါ်အောင်ဆန်းစုကြည် ၊ နေပြည်တော် ကောင်စီဥက္ကဋ္ဌ ဒေါက်တာမျိုးအောင် ၊ နေပြည်တော် ဒုတိယ မြို့တော်ဝန် ဦးရဲမင်းဦး ၊နေပြည်တော်ကောင်စီဝင် ဦးမင်းသူ တို့ နဲ့တရားခွင်မစတင်မီ မနက် ၉ နာရီ ခွဲမှာ ရှေ့နေတွေဟာ တွေ့ဆုံခွင့်ရခဲ့ပါတယ်။
အဲဒီနောက် တရားခွင်ကို မနက် ၁၀ နာရီခွဲမှာ စတင်ရာမှာတော့ တရားလိုသက်သေအဖြစ် နေပြည်တော်ဖွံ့ဖြိုးရေးကော်မတီ အမြဲတမ်းအတွင်းဝန် ဦးမျိုးအောင် ကိုကြားနာစစ်ဆေးခဲ့တယ်လို့သိရပါတယ်။
ဒီကြားနာစစ်ဆေးမှုဟာ ဒီနေ့ ရုံးချိန်းတစ်ချိန်းလုံးနီးပါးကြာမြင့်ခဲ့ပါတယ်။
နေပြည်တော်က ဒေါ်ခင်ကြည်ဖောင်ဒေးရှင်းမြေနေရာ နဲ့ပတ်သက်ပြီး အာဏာအလွဲသုံးစားလုပ်တယ်ဆိုကာ ဒေါ်အောင်ဆန်းစုကြည် ၊ ဒေါက်တာမျိုးအောင် ၊ ဦးရဲမင်းဦး ၊ ဦးမင်းသူ တို့ကို ထောင်ဒဏ် ၁၅ နှစ်ထိ ချလို့ရတဲ့ အဂတိပုဒ်မ နဲ့ စစ်ကောင်စီဟာစွဲဆိုထားတာပဲဖြစ်ပါတယ်။
စစ်တပ်ဟာ မတရားအာဏာသိမ်းပြီးတဲ့နောက် NLD ပါတီရုံးတွေကိုဝင်စီးတာ ၊ ဒေါ်ခင်ကြည်ဖောင်ဒေးရှင်းကို ဝင်ရောက်ရှာဖွေတာကို ပြုလုပ်ခဲ့တာရှိပါတယ်။