ဆောမြို့နယ် နှင့် ကန်ပက်လက်မြို့နယ် တွင် အရေးပေါ်အခြေအနေ ဖြစ်ပွားလျက်ရှိကြောင်း ပြည်ထောင်စု ကာကွယ်ရေးနှင့် လွတ်မြောက် ရေးမဟာမိတ် တပ်ပေါင်းစု (UDLA)ကသတင်းထုတ်ပြန်သည်။
နိုဝင်ဘာ ၂၂ ရက်ကစ၍ မကွေးတိုင်းဒေသကြီး၊ ဂန့်ဂေါခရိုင်၊ ဆောမြို့နယ်ရှိ လက်မွန်ရွာသို့ အကြမ်းဖက်စစ်အုပ်စုမှ ရုတ်တရက် ဝင်ရောက် လာခဲ့သည်။
မကွေးနှင့် ချင်း ပြည်နယ် ဘက် အကြားရှိ ထောက်ပို့နေသော လမ်းကြောင်းနှင့် စစ်ကူများကို ပိတ်ဆို့ရန် စစ်ကောင်စီက အင်အား (၂၀၀) ခန့်ဖြင့် စခန်းချ နေထိုင်လျက်ရှိကြောင်းလည်း ထုတ်ပြန်ချက်တွင်ဖော်ပြထားသည်။အကြမ်းဖက်စစ်အုပ်စုသည် နယ်မြေကျွမ်းကျင်သော ပျူစောထီးများနှင့်အတူ မိုင်းရှာဖွေသည့်ကိရိယာများဖြင့် ဝင်ရောက်လာပြီး YDF (ဆောနှင့်ကျောက်ထု) မှ ထောင်ထားသည့် မိုင်းများစွာအား ကျော်လွှားနိုင်ခဲ့သည်ဟု ကြေညာချက်တွင်ပါရှိသည်။
အလားတူ နိုဝင်ဘာ ၂၃ ရက်က ချင်းပြည်နယ်၊ ကန်ပက်လက်ရှိ CDF တပ်ရင်းတခုအား ဝင်စီးခံရပြီး စပါးတင်း (၁၅၀) ပါရှိသော ရိက္ခာသိုလှောင်သည့်နေရာနှင့် နေအိမ် (၃) လုံးအား မီးရှို့သွားသည်ဟုလည်း UDLA က ထုတ်ပြန်သည်။
Public Service Announcement
ယမန်နေ့က ဆောနှင့် ကန်ပက်လက် တိုက်ပွဲ၌ အကြမ်းဖက်စစ်သား (၆) ဦးထက်နည်းသေဆုံးပြီး ဒေသခံကာကွယ်ရေးတပ်ဖွဲ့များမှလည်း ထိခိုက်ဒဏ်ရာရရှိသူရှိသော်လည်း စိုးရိမ်စရာမရှိကြောင်း သိရသည်။
လက်နက်ချင်းအင်အား မမျှသဖြင့် ပြည်သူများအနေဖြင့် ဝိုင်းဝန်းကူညီကြရန် UDLA ကမေတ္တာရပ်ခံသည်။
ချင်းနှင့် မကွေး နယ်စပ်ဒေသများ၌ စစ်ကောင်စီတပ် လက်နက်အင်အားဖြည့်ခြင်း အပါအဝင် စစ်ရေးလှုပ်ရှားမှု ပိုလုပ်လာကြောင်းချင်းလက်နက်ကိုင်တပ်ဖွဲ့များက သုံးသပ်သည်။
စစ်ကောင်စီတပ်သည် အမာကို ရှောင်ပြီး အပျော့ကို တိုက်နေသည်ဟု ယူဆရကြောင်း၊ ဆော နှင့် ကန်ပက်လက်ကို အင်နှင့် အားနှင့် ဖိနေကြောင်း၊ ယင်းထိုးစစ်များပြီးလျှင် မင်းတပ်ကိုလည်း ဦးတည်လာနိုင်ကြောင်း ယူဆသည်ဟု CDF-MINDATက ထုတ်ပြန်ထားသည်။
