အမျိုးသား​နေ့ ဂုဏ်ပြုသည်ဆိုကာ ပဲခူးခရိုင်ရဲတပ်ဖွဲ့ကားနှစ်စီးကို မိုင်းဆွဲတိုက်ခိုက်

-ရဲနှစ်ဦးဒဏ်ရာပြင်းထန်ပြီး ကားတစ်စီးပျက်စီးဟု ပဲခူးPDF ထုတ်ပြန်

ပဲခူးခရိုင်ရဲတပ်ဖွဲ့ရုံးမှ ရဲကားနှစ်စီးကို ယနေ့(နိုဝင်ဘာ ၂၈)တွင် မိုင်းဆွဲတိုက်ခိုက်ခဲ့ကြောင်း ပြည်သူ့ကာကွယ်ရေးတပ်ဖွဲ့(ပဲခူးမြို့နယ်)က ထုတ်ပြန်သည်။

ဖြစ်စဉ်မှာ ယနေ့နေ့လယ် ၂ နာရီခွဲခန့်က ပဲခူးခရိုင်ရဲတပ်ဖွဲ့ရုံးမှထွက်လာသော ရဲကားနှစ်စီးကို ရွှေအောင်ရွေးဘုရားလမ်းပေါ်တွင် မိုင်းနှစ်လုံးဆက်တိုက်ဆွဲ၍ ဖောက်ခွဲတိုက်ခိုက်ခဲ့ခြင်းဖြစ်ကြောင်း ထုတ်ပြန်ချက်တွင် ဖော်ပြထားသည်။

ထိုတိုက်ခိုက်မှုကြောင့် စစ်ကောင်စီလက်အောက်ခံ ရဲနှစ်ဦးဒဏ်ရာပြင်းထန်စွာရရှိခဲ့ပြီး ကားနှစ်စီးအနက်တစ်စီးဘီးပွင့်ကာ ကျန်တစ်စီးမှာမောင်းမရတော့ကြောင်း ထုတ်ပြန်ချက်က ဆိုသည်။

Public Service Announcement

“အုန်းခနဲ အုန်းခနဲ အသံအကျယ်ကြီး နှစ်ခါကြားလိုက်တယ်။ ရွှေအောင်ရွေးဘုရားဘက်က ပစ်ခတ် သံတော့မကြားမိဘူး”ဟု ပဲခူးမြို့ခံတစ်ဦးက ပြောသည်။

ထိုကဲ့သို့ စစ်ကောင်စီလက်အောက်ခံတပ်ဖွဲ့များအားတိုက်ခိုက်ခြင်းမှာ ယနေ့ကျရောက်သည့် အမျိုးသားအောင်ပွဲနေ့ကို ဂုဏ်ပြုတိုက်ခိုက်ခြင်းဖြစ်ပြီး ဆက်လက်တိုက်ပွဲဝင်သွားမည်ဖြစ်ကြောင်း ပြည်သူ့ကာကွယ်ရေးတပ်ဖွဲ့(ပဲခူးမြို့နယ်)က အသိပေးထားသည်။