မွန်ပြည်နယ် ကျိုက်ထိုမြို့နယ်အတွင်းရှိ ပြည်သူ့ကာ ကွယ်ရေးတပ်ဖွဲ့(PDF) တည်ရှိရာနေရာသို့ လာရောက်တိုက်ခိုက်သည့် စစ်ကောင်စီတပ်ကို ကရင်အမျိုးသားအစည်းအရုံး(KNU) တပ်မဟာ(၁)နင့် PDFတို့ ပူးပေါင်းပြီး ပြန်လည်တိုက်ခိုက်ခဲ့၍ စစ်ကောင်စီတပ်ဖွဲ့ဝင် ၁၁ဦးသေဆုံးခဲ့ကြောင်းတပ်မဟာ(၁) တာဝန်ရှိသူတစ်ဦးကပြောသည်။
ဒီဇင်ဘာ ၂ရက် နံနက် ၈နာရီခွဲခန့်တွင် ကျိုက်ထိုမြို့နယ် ရွှေခဲရိုးကျေးရွာအနီးရှိ PDF တပ်ဖွဲ့ကို စစ်ကောင်စီတပ်က ဝင်ရောက်တိုက်ခိုက်ခဲ့၍ CDM ရဲတစ်ဦး ကျဆုံးပြီးလက်နက် တစ်လက်ဆုံးရှုံးခဲ့သည်။ ထိုနောက်နံနက် ၁၀နာရီခန့်တွင် အဆိုပါစစ်ကောင်စီတပ်ကို KNU/PDF ပူးပေါင်းအဖွဲ့တို့က လိုက်လံတိုက်ခိုက်ခဲ့ခြင်းဖြစ်သည်။
“ပထမဖြစ်စဉ်က အဲဒီစစ်ကောင်စီက PDF အဖွဲ့ကို သွားပစ်တယ်။ တစ်ယောက် ဆုံးသွားပြီးတော့ AK တစ်လက်ရသွားတယ်။ နောက်မှ ကျွန်တော်တို့ အဖွဲ့နဲ့ သူတို့ နယ်မြေရှင်းလင်းတော့ ထိပ်တိုက် ပစ်ခတ်မှုတွေဖြစ်ပွားတာ”ဟု KNU တပ်မဟာ(၁) တာဝန်ရှိသူက ပြောသည်။
KNU တပ်မဟာ(၁)နှင့် စစ်ကောင်စီတပ်တို့သည် ပြီးခဲ့သည့် ရက်ပိုင်းအတွင်းကလည်း ကျိုက်ထိုမြို့နယ် အတွင်း၌ တိုက်ပွဲဖြစ်ပွားခဲ့၍ စစ်ကောင်စီတပ်က သေဆုံးထိခိုက်မှုများရှိခဲ့သည်။ စစ်ရေးလှုပ်ရှားလာသည့် စစ်ကောင်စီတပ်ယာဉ်တန်းကို ဘိုက္ကားကျေးရွာအနီး၌ KNU တပ်မဟာ(၁)က တိုက်ခိုက်ခဲ့ခြင်းဖြစ်သည်။ KNU တပ်မဟာ(၁)နယ်မြေတွင် နိုဝင်ဘာလအတွင်းကလည်း တိုက်ပွဲများ မကြာခဏ ဖြစ်ပွားခဲ့သည်။
Public Service Announcement
