အကြမ်းဖက်စစ်ကောင်စီကို ဖိအားတိုးမြှင့်ဖို့ အမေရိကန်ထပ်မံကတိပြု

-နည်းလမ်းပေါင်းစုံနဲ့ဖိအားပေးရေးနိုင်ငံတကာကို တိုက်တွန်း

ပြည်သူတွေကို ဖမ်းဆီးထိန်းသိမ်းခြင်းနဲ့ အကြမ်းဖက်လုပ်ရပ်တွေ ရပ်တန့်ဖို့ မြန်မာစစ်ကောင်စီကို ပိတ်ဆို့ဒဏ်ခတ်မှုတိုးမြှင့်ခြင်းအပါအဝင် နည်းလမ်းပေါင်းစုံနဲ့ ဖိအားပေးသွားမယ်လို့ အမေရိကန်နိုင်ငံခြားရေးလက်ထောက်ဝန်ကြီးက ဒီဇင်ဘာ ၂ ရက်မှာ ပြောပါတယ်။

“နည်းလမ်းအားလုံးဟာ စားပွဲပေါ်မှာ ရှိပါတယ်။ မြန်မာပြည်သူတွေအပေါ် ကျူးလွန်တဲ့အကြမ်းဖက်မှု၊ လက်ခံနိုင်ဖွယ်မရှိတဲ့ အာဏာသိမ်းမှုနဲ့ ကျွန်တော်တို့သက် ရောက်ပြောင်းလဲနိုင်တဲ့ဘယ်အရာကိုမဆို လုပ်ဆောင်ဖို့ အမေရိကန်သာမက နိုင်ငံတကာအသိုင်းအဝိုင်းမှာပါ တာဝန်ရှိပါတယ်”လို့ အမေရိကန်နိုင်ငံခြားရေးဝန်ကြီးဌာနရဲ့ အရှေ့အာရှနှင့် ပစိဖိတ်ရေးရာ လက်ထောက်ဝန်ကြီး Mr. Daniel Kritenbrink က ​ပြောပါတယ်။

အမေရိကန်နိုင်ငံခြားရေး လက်ထောက်ဝန်ကြီးဟာ အရှေ့တောင်အာရှလေးရက်ကြာခရီးစဥ်အတွင်း စင်ကာပူမှာ ပြောကြားခဲ့ပြီး ကွာလာလမ်ပူ၊ ဂျာကာတာနဲ့စင်ကာပူတို့ကိုသွားရောက်ခဲ့ကာ ဘန်ကောက်မှာ ခရီးစဥ်​ပြီးဆုံးမှာ ဖြစ်ပါတယ်။

Public Service Announcement

မြန်မာနိုင်ငံမှာ စစ်အာဏာသိမ်းမှုနဲ့ပတ်သက်လို့ “စစ်ကောင်စီအပေါ် ဖိအားမြှင့်တင်ရေး ကျွန်တော်တို့လုပ်ဆောင်နိုင်တဲ့ နောက်ထပ်အဆင့်တွေကို ဆက်လက်ရှာဖွေဖော်ထုတ်သွားမှာပါ။ ဖိနှိပ်မှုတွေလုပ်ဆောင်ဖို့ စစ်ကောင်စီရရှိနေတဲ့ ဘဏ္ဍာရေးစီးကြောင်းတွေကို ဖြတ်တောက်သွားမှာပါ”လို့ လက်ထောက်ဝန်ကြီး Mr Kritenbrink က ပြောပါတယ်။