အရပ်သား ဆန္ဒပြပွဲများကို စစ်တပ်က ဖြိုခွင်းသဖြင့် အသက်ဆုံးရှုံးခဲ့ရသူများအား ရည်စူးပြီး ဒိန်းမတ်၊ ဖင်လန်၊ နော်ဝေနှင့် ဆွီဒင်နိုင်ငံများ၏ မြန်မာနိုင်ငံဆိုင်ရာ သံရုံးများက နှင်းဆီပန်း ၁,၃၂၃ ပွင့်ခင်းကျင်း ဂုဏ်ပြုခဲ့သည်။
ယနေ့(ဒီဇင်ဘာ ၁၀ရက်)ကျရောက်သည့် အပြည်ပြည်ဆိုင်ရာ လူ့အခွင့်အရေးနေ့တွင် ပြုလုပ်သည့် ကျဆုံးမြန်မာပြည်သူများအား ဂုဏ်ပြုမှုကို သံရုံးလေးခုက ပူးပေါင်းလုပ်ဆောင်ခဲ့ခြင်းဖြစ်သည်။
အဆိုပါ နိုင်ငံလေးခု အနေဖြင့် မြန်မာနိုင်ငံသူနိုင်ငံသားများ၏ ဒီမိုကရေစီနှင့် လူ့အခွင့်အရေးဆိုင်ရာ မျှော်မှန်းချက်များကို ဆက်လက်ထောက်ခံ အားပေးသွားမည် ဖြစ်ကြောင်း၊ ဖေဖေါ်ဝါရီ ၁ ရက်မှစပြီး လူ့အခွင့်အရေးကို ကာကွယ်ရင်း အသက်ဆုံးရှုံးခဲ့ရသူများ၊ ထိန်းသိမ်းခံ ထားရသူများကို ဂုဏ်ပြုကြောင်း ဖော်ပြခဲ့သည်။
ကုလသမဂ္ဂ အဖွဲ့ဝင်နိုင်ငံအားလုံးသည် အပြည်ပြည်ဆိုင်ရာ လူ့အခွင့်အရေး ကြေညာစာတမ်းကို လက်ခံကျင့်သုံးနေသော်လည်း မြန်မာနိုင်ငံအပါအဝင် ကမ္ဘာတစ်ဝှမ်းတွင် မညီမျှမှုများနှင့် ချန်လှပ်ထားမှုများ ရှိဆဲ ဖြစ်သည်ဟု ဆိုသည်။
မြန်မာနိုင်ငံတွင် ကိုးဗစ်၁၉ ရောဂါ အကျပ်အတည်းနှင့် အာဏာသိမ်းမှုတို့ကြောင့် မညီမျှမှုများ သိသိသာသာ တိုးလာပြီး အခြေခံ နိုင်ငံသားအခွင့်အရေးနှင့် နိုင်ငံရေး ရပိုင်ခွင့်များ၊ လွတ်လပ်ခွင့်များကို များစွာ ထိခိုက်ရုံသာမက မြန်မာနိုင်ငံသူနိုင်ငံသားများ၏ စီးပွားရေး၊ လူမှုရေးနှင့် ယဉ်ကျေးမှုဆိုင်ရာ အခွင့်အရေးများလည်း လွန်စွာ ထိခိုက်ခဲ့ရကြောင်း ဖော်ပြထားသည်။