ထားဝယ်အကျဥ်းထောင်၌ ထိန်းသိမ်းခံထားရသည့် စစ်အာဏာရှင်ဆန့်ကျင်ရေး တက်ကြွလှုပ်ရှားသူ အမျိုး သမီးတစ်ဦး မစုလှိုင်နွေးသည် ကျန်းမာရေးအခြေအနေစိုးရိမ်နေရကြောင်း ထားဝယ်နိုင်ငံရေးအကျဥ်းသားများကွန်ရက်(DPPN) ကထုတ်ပြန်သည်။
ထားဝယ်မြို့ပေါ် စစ်အာဏာရှင်ဆန့်ကျင်ရေးလှုပ်ရှားမှုတွင် ဦးဆောင်ပါဝင်ခဲ့သည့် မစုလှိုင်နွေးသည် ပြီးခဲ့သည့်မေလ ၂၉ရက်က အခြားလူငယ် ရှစ်ဦးနှင့်အတူ ဖမ်းဆီးခံခဲ့ရခြင်းဖြစ်သည်။ မစုလှိုင်နွေးအပါအဝင် ကိုးဦးကို ၅၀၅(က) ၊၅၀၅(ဂ)၊ အကြမ်းဖက်ပုဒ်မ ၅၂(က) ပုဒ်မများဖြင့် အမှုဖွင့်ထားပြီး ထောင်တွင်းတရားရုံး၌ စစ်ဆေးနေဆဲ ဖြစ်သည်။
အသက် (၂၆) နှစ်အရွယ် မစုလှိုင်နွေးသည် ကျောက်ကပ်၊ သားအိမ်နှင့်ပတ်သက်သည့် ရောဂါရှိသူဖြစ်ကြောင်း၊ ယင်းရောဂါများကြောင့် ထောင်ထဲ၌ မကြာခဏ နေမကောင်းဖြစ်ခဲ့ကြောင်း ဖော််််ပြထားသည်။
၎င်းသည် ပြီးခဲ့သည့် အောက်တိုဘာက ရောဂါပြင်းထန်ခဲ့ရာနေအိမ်က ပို့ပေးသည့်ဆေးများကြောင့် ပြန် သက်သာခဲ့သော်လည်း ဒီဇင်ဘာ ၉ရက်တွင် ရောဂါပြန်ဆိုးရွားလာခြင်း ဖြစ်သည်ဟု ဆိုသည်။
Public Service Announcement
အသက်ရှုကြပ်ခြင်း ၊သွေးအလွန်အကျွံဆင်းခြင်းတို့ ဖြစ်ပေါ်ခဲ့၍ အရေးပေါ်အောက်စီဂျင်ပေးပြီး ထားဝယ်ဆေးရုံ၌ အရေးပေါ်ဆေးကုသမှုခံယူခဲ့ရကြောင်း၊ မစုလှိုင်နွေး၏ ရောဂါအခြေအနေသည် ဆေးရုံ၌ထား၍ အထူးကြပ်မတ်ကုသရမည့် အခြေအနေမျိုးဖြစ်သော်လည်း နေ့တွင်းချင်း ထားဝယ်အကျဥ်းထောင်သို့ ပြန်ခေါ်သွားခဲ့ကြောင်း၊ မစုလှိုင်နွေး၏ ကျန်းမာရေးအခြေအနေ ပိုမိုဆိုးရွားလာမည်ကို အထူးစိုးရိမ်လျက်ရှိကြောင်း DPPNက ထုတ်ပြန်သည်။
