မြန်မာနိုင်ငံကနေရပ်စွန့်ခွာတိမ်းရှောင်လာရသူတွေကိုလက်ခံထားဖို့နဲ့နေရပ်ပြန်မပို့ဖို့ အိမ်နီးချင်းနိုင်ငံတွေကိုတိုက်တွန်း

အာဏာသိမ်းစစ်ကောင်စီရဲ့ အကြမ်းဖက် ဖမ်းဆီး ညှင်းပန်းနှိပ်စက်မှုဒဏ်ကနေ လွတ်မြောက်အောင် ထွက်ပြေးတိမ်းရှောင်လာရသူတွေကို အိမ်နီးချင်းနိုင်ငံတွေအနေနဲ့ လက်ခံပေးထားဖို့နဲ့ အတင်းအကြပ် ပြန်လည်နှင်ထုတ်တာတွေ မလုပ်ဖို့ မဲခေါင်ရွှေ့ပြောင်းသွားလာရေးကွန်ရက်က တိုက်တွန်းလိုက်ပါတယ်။

အကြမ်းဖက်စစ်အုပ်စုကြောင့် ပြည်တော်ပြန်လာမယ့်သူတွေ တစ်ဦးတစ်ယောက်မှ လုံခြုံမှုကို အာမခံချက်မရှိတဲ့အတွက် မြန်မာနိုင်ငံက တိမ်းရှောင်လာရသူတွေကို နေရပ်ပြန်မပို့ရေးမူကျင့်သုံးရမယ်လို့ မြန်မာနိုင်ငံရဲ့အိမ်နီးချင်းနိုင်ငံတွေကို အဲဒီကွန်ရက်က တိုက်တွန်းထားတာပါ။

အိမ်နီးချင်းနိုင်ငံတွေအနေနဲ့နေရပ်စွန့်ခွာ ထွက်ပြေးတိမ်းရှောင်လာရသူတွေကိုအကာအကွယ်ပေးဖို့ ၊ တတိယနိုင်ငံကိုပြန်လည်နေရာချဖို့အတွက် ပံ့ပိုးကူညီပေးကြဖို့ကိုလည်း ပြောထားပါတယ်။

နိုင်ငံတကာအသိုင်းအဝိုင်းနဲ့ နိုင်ငံတကာအဖွဲ့အစည်းတွေအနေနဲ့ လည်းအရေးပေါ်နေထိုင်တဲ့နေရာတွေ ၊ စားနပ်ရိက္ခာတွေ ၊ ဆေးဝါးကုသမှုတွေ အတွက် ငွေကြေးပံ့ပိုးတာ ၊ လိုအပ်တဲ့အထောက်အပံ့တွေပေးကြဖို့ကိုလည်းအကြံပြုထားတာတွေ့ရပါတယ်။

Public Service Announcement

စစ်တပ်အာဏာသိမ်းပြီးနောက် ပြည်တွင်းမှာတင်နေရပ်စွန့်ခွာကြရသူဦးရေဟာ သုံးသိန်းရှစ်သောင်းကျော်ရှိနေတယ်လို့သိရပါတယ်။

နယ်စပ်ဖြတ်ကျော်ပြီး တိမ်းရှောင်ရသူအရေအတွက်ကိုတော့အတိအကျ မသိရသေးပါဘူး။

လက်ရှိအချိန်မှာလည်း ကရင်ပြည်နယ် ၊နယ်စပ်မြို့ လေးကေကော်မြို့သစ်မှာ ဖြစ်တဲ့တိုက်ပွဲတွေကြောင့် ဒေသခံတွေဟာ ဘေးလွတ်ရာ ထိုင်းနိုင်ငံဘက်ကို အများအပြားထွက်ပြေးတိမ်းရှောင်နေကြရပါတယ်။