အကျဉ်းထောင်တွေကိုသွားရောက်လေ့လာဖို့အတွက် အကြိမ်ကြိမ်ဆွေးနွေးခဲ့ပေမယ့် ခွင့်ပြုချက်မရသေးကြောင်း မြန်မာနိုင်ငံမှာ ရှိတဲ့ အပြည်ပြည်ဆိုင်ရာကြက်ခြေနီအဖွဲ့ (ICRC ) သတင်းထုတ်ပြန်ပြီးအသိပေးလိုက်ပါတယ်။
ဒီဇင်ဘာလ ၁၀ ရက်က ထောင်တွင်းမှာ အသံတိတ်သပိတ်ကို ဆင်နွှဲခဲ့သူ ၈၉ ဦး အပြင်းအထန်ရိုက်နှက်ခံရပြီး ဆေးဝါးကုသခွင့်မပေးဘဲ တိုက်ပိတ်ထားတဲ့ဖြစ်စဉ်ကို ICRC အနေနဲ့ အမြန်ဆုံးသွားရောက်စုံစမ်းပေးဖို တောင်းဆိုမှုတွေရှိလာချိန် မှာ ICRC က ထုတ်ပြန်လာတာပါ။
ပြီးခဲ့တဲ့ရက်ပိုင်းက ထုတ်ပြန်တဲ့ ICRC ရဲ့ထုတ်ပြန်ချက်မှာ ကိုဗစ်ကြောင့် အကျဉ်းထောင်တွေကို သွားရောက်လေ့လာမှုဟာ ပြီးခဲ့တဲ့ ၂၀၂၀ မတ်လကစတင်ပြီး ရပ်နားခဲ့ရတယ်လို့သိရပါတယ်။
အဲဒီနောက် အကျဉ်းထောင်တွေကိုပြန်လည်ဝင်ရောက်လေ့လာဖို့ တာဝန်ရှိသူအဆင့်ဆင့်နဲ့ အကြိမ်ကြိမ် ဆွေးနွေးတာတွေလုပ်ခဲ့ပေမယ့် စတင်ဖို့ခွင့်ပြုချက် မရသေးဘူးလို့ ဆိုပါတယ်။
ဒါပေမယ့် ICRC အနေနဲ့ နိုင်ငံတဝှမ်းက ရုံးခွဲတွေကိုလာရောက်အကူအညီတောင်းခံသူ တွေကို ကူညီပေးနေပြီး မိသားစု ၈၅၀ ကျော်ကို သူတို့ရဲ့သက်ဆိုင်သူတွေ ထိန်းသိမ်းခံထားရာ နေရာတွေကိုသိနိုင်အောင် ကူညီပေးခဲ့တယ်လို့ ထုတ်ပြန်ချက်မှာဖော်ပြထားတာတွေ့ရပါတယ်။
ဒီဇင်ဘာလ ၁၀ ရက်နေ့ က အင်းစိန်ထောင်မှာ အသံတိတ်သပိတ်ဆင်နွှဲသူ ၈၉ ဦးကို ထောင်အာဏာပိုင်တွေဟာအပြင်းအထန်ရိုက်နှက်ခဲ့ပြီး ဆေးဝါးကုသခွင့်မပေးဘဲ လက်ရှိအချိန်ထိ တိုက်ပိတ်ထားတယ်လို့သိရပါတယ်။
ရိုက်နှက်ခံရသူတွေဟာ ဆေးဝါးကုသမှုလိုအပ်နေပြီး စိုးရိမ်ရသူတွေရှိတယ်လို့ ရှေ့နေတွေက ပြောထားကြပါတယ်။
ဒါအပြင် ဒီလို ဆန္ဒပြသူတွေကို အကျဉ်းထောင်ဥပဒေနဲ့ အမှုထပ်တိုးဖို့ စီစဉ်နေတာလည်းကြားသိရတယ်လို့ ရှေ့နေတွေက ဆိုကြပါတယ်။
ဒါကြောင့်အကျဉ်းထောင်ထဲက လူ့အခွင့်အရေးချိုးဖောက်မှုတွေကို အမြန်ဆုံးစုံစမ်းဖော်ထုတ်နိုင်ဖို့ ICRC အဖွဲ့ကြီးအနေနဲ့ထောင်ထဲကိုအမြန်ဆုံးသွားရောက်ပေးဖို့ စစ်အာဏာရှင်ဆန့်ကျင်ရေးအဖွဲ့တွေက တိုက်တွန်းနေကြပါတယ်။