အကြမ်းဖက်စစ်ကောင်စီလက်အောက်ခံ ကရင်ပြည်နယ်နယ်ခြားစောင့်တပ်(BGF)က ၎င်း၏တပ်ဖွဲ့ဝင်များအား ညဖက်တွင် တာဝန်ချိန်မှလွဲ၍ ယူနီဖောင်းမဝတ်ရန် ညွှန်ကြားချက်ထုတ်ပြန်လိုက်သည်။
မြဝတီမြို့နယ်အတွင်းရှိ BGF တပ်ရင်း၊တပ်နယ်၊ တပ်ဖွဲ့များအားလုံး ဒီဇင်ဘာ ၁၈ရက်မှစ၍ ညအချိန် တာဝန်မှအပ ယူနီဖောင်း(အပြည့်/တစ်ပိုင်း) လုံဝ ဝတ်ဆင်ခြင်းမပြုရန် BGF က ယနေ့(ဒီဇင်ဘာ ၁၈ရက်) တွင် တပ်ဖွဲ့တွင်း ညွှန်ကြားခြင်းဖြစ်သည်။
အမြဲလိုလို ယူနီဖောင်းဝတ်ကာ မြို့တွင်း သွားလာနေသည့် BGF တပ်ဖွဲ့ဝင်များကို ယခုကဲ့သို့ ကန့်သတ်လိုက်ခြင်းသည် ပုံမှန်အခြေအနေမဟုတ်ဘဲ ထိန့်လန့်နေခြင်း ဖြစ်နိုင်သည်ဟု KNU/KNLA တပ်ဖွဲ့ဝင်တစ်ဦးက ပြောသည်။
မြေပြင်တိုက်ပွဲဝင်နေသည့် KNU/KNLA တပ်ဖွဲ့ဝင်တစ်ဦးက ” BGF လည်း ကျီးလန့်စာစားဖြစ်နေပြီ။ သေမှာ ကြောက်နေပြီ”ဟု မှတ်ချက်ပြုသည်။
ဒေသခံတစ်ဦးကလည်း” BGFက ဘာသိက္ခာမှ မရှိဘူး။ လုပ်စားနေကြတာ။ အခုတော့ ကြောက်လန့်နေပြီထင်တယ်”ဟု ပြောသည်။
လတ်တလောဖြစ်ပွားနေသည့်လေးကေ့ကော်တိုက်ပွဲတွင် BGFက စစ်ကောင်စီဘက်က တိုက်ခိုက်နေသည်။ KNU က ဖမ်းမိထားသည် စစ်ကောင်စီတပ်ဖွဲ့ဝင်များထဲတွင် BGF တပ်ဖွဲ့ဝင်များလည်း ပါဝင်နေသည်။BGFခေါင်းဆောင်မှာစောချစ်သူဖြစ်ပြီး အကြမ်းဖက်စစ်တပ်စေခိုင်းသည့်အတိုင်း ရပ်တည်ခြင်းအတွက် ကရင်လူမျိုးများအား သစ္စာဖောက်သူအဖြစ် ကရင်တိုင်းရင်းသားများက ပြစ်တင်ရှုတ်ချထားသည်။