မန္တလေးမှာ ဆန္ဒပြလူငယ်တွေကို ဖမ်းဆီးဖို့ စစ်ကောင်စီကင်းပုန်းဝပ်တာတွေကိုပါလုပ်ဆောင်နေ

စစ်အာဏာရှင်ဆန့်ကျင်ရေးအတွက် အကြမ်းဖက်ဖမ်းဆီးသတ်ဖြတ်မှုတွေရှိနေပေမယ့် နေ့စဉ်နီးပါး လမ်းပေါ်ထွက်ကာ ဆန္ဒပြတဲ့ မန္တလေးက သပိတ်လူငယ်တွေကို ဖမ်းဆီးဖို့စစ်ကောင်စီဟာ ကင်းပုန်းချပြီး သတင်းယူကာ လိုက်လံဖမ်းဆီးတာတွေလုပ်နေတယ်လို့သိရပါတယ်။

စစ်ကောင်စီတပ်ဖွဲ့ဝင်တွေဟာ ဆန္ဒပြနိုင်ခြေရှိတဲ့ လမ်းတွေမှာ အရပ်ဝတ်နဲ့စောင့်ကြည့်သလို ၊ ကင်းပုန်း ဝပ်ပြီး စောင့်ဆိုင်းတာတွေ လုပ်နေတာကို သိရတယ်လို့ ဆန္ဒပြလူငယ်အချို့ကပြောကြပါတယ်။

“သူတို့က နောက်ယောင်ခံပြီးတော့ကိုလိုက်တာပဲ၊ လမ်းမတွေရဲ့ နေရာတိုင်းမှာ ကင်းပုန်းထားတယ်၊ဆန္ဒပြဖို့ ဆိုင်းဘုတ်ကိုင်လိုက်တာမျိုး၊ လူစုလိုက်တာနဲ့ချက်ချင်းသိပြီး စစ်ကားတွေရောက်လာပြီး တိုက်ဖမ်းတော့တာပဲ” လို့ ဆန္ဒပြလူငယ်တစ်ဦးက ဆိုပါတယ်။

ဒါအပြင် ဆန္ဒပြပွဲအပြီး နောက်ကနေ ခြေရာခံလိုက်ကာ ဖမ်းဆီးတာမျိုးလည်းရှိနေပါတယ်။

Public Service Announcement

လက်ရှိမှာလုံခြုံရေးအခြေနေကြောင့် သပိတ်တွေအသံတိတ်နေသေးတာဖြစ်ပြီးမကြာမီ ပြန်ထွက်လာတော့မယ်လို့ ဆန္ဒပြသပိတ်စစ်ကြောင်းက လူငယ်တွေက ပြောပါတယ်။

မန္တလေးမှာ စစ်ကောင်စီတပ်တွေဟာ နေ့စဉ် လမ်းတော်တော်များများမှာ ပိတ်ဆို့စစ်ဆေးတာတွေပြုလုပ်လျက်ရှိနေပါတယ်။