တအာင်းနှစ်သစ်ကူးနေ့သို့ အမျိုးသားညီညွတ်ရေးအစိုးရ(NUG)က သဝဏ်လွှာပေးပို့ခဲ့ရာ စစ်အာဏာရှင် ချုပ်ငြိမ်းရေး၊ ပြည်သူ့လွတ်မြောက်ရေးအတွက် ခုခံတွန်း လှန်စစ်ဆင်နွဲနေကြသည့် တအာင်းဒေသအပါ အဝင် နိုင်ငံတဝှမ်းမှ ပြည်သူများအားလုံး တစ်ခဲနက် အောင်မြင်မှု များရရှိနိုင်ပါစေဟု ဖော်ပြခဲ့သည်။
ယနေ့(ဒီဇင်ဘာ ၂၄ရက်)သည် တအာင်းလူမျိုးတို့၏ (၂၇၁၃) နှစ်မြောက်နှစ်သစ်ကူးနေ့ ဖြစ်သည်။
တအာင်းလူမျိုးတို့သည် ပြည်ထောင်စုမြန်မာနိုင်ငံအတွင်းရှိ အခြားသောလူနည်းစုတိုင်းရင်းသားလူမျိုးများ ကဲ့သို့ပင် လူမျိုး မတူကွဲပြားမှုကို အကြောင်းပြု၍ နိုင်ငံရေး၊ စီးပွားရေး၊ လူမှုရေးအဘက်ဘက်တွင် မျိုးစုံ သော ခွဲခြားဘေးဖယ် ခံရမှုများကြောင့် ပြည်ထောင်စုအတွင်း ကိုယ်ပိုင်ပြဌာန်းခွင့်ရရှိရေး၊ အမျိုးသားတန်းတူရေးနှင့် ကိုယ့်ကြမ္မာကိုယ် ဖန်တီးခွင့်ရရှိရေးအတွက် စည်းလုံးညီညွတ်စွာတိုက်ပွဲဝင်နေကြသည်ကို တွေ့ရှိရကြောင်း သဝဏ်လွှာတွင် ဖော်ပြသည်။
လက်ရှိအချိန်သည် တအာင်းလူမျိုးများ အပါအဝင် မြန်မာနိုင်ငံသူနိုင်ငံသားအပေါင်း လုံခြုံငြိမ်းချမ်းမှု၊ ဒီမိုကရေစီနှင့်လူ့အခွင့်အရေး၊ လွတ်လပ်မှုနှင့် တရားမျှတမှုတို့ ပျောက်ဆုံးကင်းမဲ့နေပြီး စစ်ကောင်စီ၏လူမဆန်သောရက်စက်ကြမ်းကြုတ်မှု များကြောင့် တိုင်းရင်းသားများအားလုံးစိတ်ဆင်းရဲ၊ ကိုယ်ဆင်းရဲညိုးငယ်စွာနေထိုင်နေကြရသည့် အချိန်ကာလ ဖြစ်သည်ဟု ဆိုသည်။
တအာင်းနှစ်သစ်ကူးနေ့ရက်တွင် တအာင်းလူမျိုးများအပါအဝင် မြန်မာနိုင်ငံသူနိုင်ငံသားများ လက်လွတ် ပျောက်ဆုံးခဲ့ရသောလုံခြုံငြိမ်းချမ်းမှု၊ ဖက်ဒရယ်ဒီမိုကရေစီနှင့် လူ့အခွင့်အရေးဆိုင်ရာမျှော်မှန်းချက်များ ဖြစ် ထွန်းရှင်သန်လာနိုင်ပါစေဟုလည်း သဝဏ်လွှာတွင် ဖော်ပြခဲ့သည်။