ကော့ကရိတ်မြို့နယ် အာရှလမ်းမဘက်မှာ ဒီကနေ့မနက်ပိုင်းက KNLAနဲ့ စစ်ကောင်စီ BGF ပူးပေါင်းတပ်တို့အကြား တိုက်ပွဲတွေပြင်းထန်နေပြီး စစ်ကောင်စီက လေကြောင်းတိုက်ခိုက်မှုတွေ လုပ်ဆောင်နေတယ်လို့ ကေအဲန်ယူသတင်းရင်းမြစ်တစ်ဦးထံကနေ သိရပါတယ်။
ကေအဲန်ယူ ထိန်းချုပ်နယ်မြေဖြစ်တဲ့ ဒူးပလာယာခရိုင် ကော့ကရိတ်မြို့နယ် အာရှလမ်းမအနီးမှာရှိတဲ့ ကေအဲန်ယူမွေးမြူရေးဇုန်အနီးမှာ ဒီကနေ့ မနက် ၆ နာရီအချိန်ကစပြီး နှစ်ဖက်ထိတွေ့ပစ်ခတ်မှု ဖြစ်ပွားခဲ့ကာ ကော့ကရိတ်မြို့နယ်ထဲမှာ လေကြောင်းတိုက်ခိုက်မှုဟာ ပထမဆုံးအကြိမ်ဖြစ်တာပါ။
ဒီလို KNLA တပ်မဟာ ၆ နဲ့ စစ်ကောင်စီ BGF ပူးပေါင်းတပ်တို့အကြား ထိတွေ့ပစ်ခတ်တဲ့ဖြစ်စဉ်မှာ စစ်ကောင်စီပူးပေါင်းအဖွဲ့က အနည်းဆုံး ၇ ဦးခန့် သေဆုံးသွားခဲ့တယ်လို့ ဒေသတွင်းသတင်းဌာနတွေက ဖော်ပြကြပါတယ်။
တိုက်ပွဲဖြစ်ပွါးနေစဉ်အတွင်း စစ်ကောင်စီဘက်က ကော့ကရိတ်မြို့ပေါ်မှာရှိတဲ့ ခလရ (၉၇) တပ်ရင်းထဲကနေ လက်နက်ကြီးနဲ့ ပစ်ခတ်တာတွေ လုပ်ဆောင်နေခဲ့ပြီး ဒီကနေ့ နေ့လည် ၁၂ နာရီခွဲကနေ ၁ နာရီ ၁၅ မိနစ်အချိန်အတွင်း လေယာဉ်နဲ့လာရောက်ကာ ပစ်ခတ်တိုက်မှုတွေလုပ်ဆောင်ခဲ့တယ်လို့ ကေအဲန်ယူသတင်းရင်းမြစ်တစ်ဦးက ပြောပါတယ်။
Public Service Announcement
ဒီလို စစ်ကောင်စီက လေကြောင်းတိုက်ခိုက်မှုကြောင့် ထိခိုက်ကျဆုံးမှုတွေကို လတ်တလောမှာ အတည်မပြုနိုင်သေးဘူလို့ ကေအဲန်ယူသတင်းရင်းမြစ်တစ်ဦးက ထပ်ပြောပါတယ်။
လက်ရှိမှာတော့ စစ်ကောင်စီတပ်တွေက စစ်ကား ၄ စီးနဲ့ ထပ်မံတက်ရောက်လာပြီး လေယာဉ်လည်း ထပ်ရောက်လာဦးမယ်လို့ ကြားသိရကြောင်း သိရပါတယ်။
