စစ်ကိုင်းတိုင်း ကလေးမြို့နယ် နတ်ချောင်းရွာတွင် အကြမ်းဖက် စစ်ကောင်စီတပ်က နေအိမ်၊ ကားနှင့် ဆိုင်ကယ်အပါအဝင် ပြည်သူလူထုပိုင် ပစ္စည်းများကို မီးရှို့ ဖျက်ဆီးသွားကြောင်း ဒေသခံက ဓာတ်ပုံနှင့်တကွ လူထုနွေဦးသို့ ပေးပို့လာသည်။
စစ်ကောင်စီတပ်သည် ဒီဇင်ဘာ ၂၄ရက်၊ ၂၅နှင့် ၂၆ရက်တို့တွင် ရွာရှိ နေအိမ်အချို့ကို မီးရှို့ခဲ့ပြီး ယနေ့ ဒီဇင်ဘာ ၂၇ရက်မနက်တွင် ကားနှင့် ဆိုင်ကယ်များကို မီးရှို့ဖျက်ဆီးသွားသည်ဟု ၎င်းက ဆိုသည်။
ထို့ပြင် အဆိုပါကျေးရွာ၌ စစ်ကောင်စီတပ်က ဒေသခံများကို ဖမ်းဆီး သတ်ဖြတ်မှုများလုပ်ဆောင်ခဲ့ရာ ရွာသူရွာသား ငါးဦးထက်မနည်း ဖမ်းဆီးခံရပြီး စစ်ကောင်စီတပ်၏ သတ်ဖြတ်မှုကြောင့် အပြစ်မဲ့ ပြည်သူ ၁၁ဦး သေဆုံးခဲ့ရသည်ဟု ဒေသခံက ပြောသည်။
ဒီဇင်ဘာ ၂၂ရက်မှ ယနေ့နံနက်ထိ ဒေသခံ ပြည်သူ့ကာကွယ်ရေးတပ်ဖွဲ့နှင့် တိုက်ပွဲဖြစ်ခဲ့ရာ ဒီဇင်ဘာ ၂၃ရက်တွင် ရဟတ်ယာဉ် ၂စီးဖြင့် စစ်ကောင်စီက တိုက်ခိုက်ခဲ့သည်ဟု ဆိုသည်။
Public Service Announcement
