စစ်ကိုင်းတိုင်း မင်းကင်းမြို့နယ်တွင် အကြမ်းဖက်စစ်ကောင်စီတပ်က အင်အားအများအပြားဖြင့် ထိုးစစ်ဆင်ခဲ့သောကြောင့် စခန်းကုန်းမှ စွန့်ခွာခဲ့ရကြောင်း MDF Special Forces က ယနေ့ ထုတ်ပြန်သည်။
သို့သော် စခန်းကုန်းပတ်လည်တွင် ထောင်ထားခဲ့သည့် မိုင်းများကြောင့် စစ်ကောင်စီဘက်မှ အထိအခိုက်အကျအဆုံးရှိနိုင်ကြောင်းလည်း MDF Special Forces က ဆိုသည်။
“ MDF နဲ့ ကျွန်တော်တို့ မင်းကင်း PDF အဖွဲ့ ရဲ့ ပူးပေါင်း နေရာကို မနေ့က(ဒီဇင်ဘာ ၂၆ ရက်)နေ့လည် ၁ နာရီခွဲလောက်မှာ စစ်တပ်က ဝင်လာတယ်။လူအင်အားချင်းတော့ ယှဥ်နိုင်ပေမယ့် လက်နက် မမျှတော့ ဆုတ်ခွာပေးခဲ့ရတယ်” ဟု မင်းကင်း PDF မှ ဗိုလ်လွင်က လူထုနွေဦးသို့ ပြောသည်။
ဆုတ်ခွာစဥ် အကြမ်းဖက်စစ်ကောင်စီ၏ လက်နက်ကြီးပစ်ခတ်မှုမှ ကျည်စင်၍ ရဲဘော်တစ်ဦး ထိခိုက်ဒဏ်ရာရရှိခဲ့သော်လည်း စိုးရိမ်စရာအခြေ အနေမရှိတော့ဟု ၎င်းက ဆိုသည်။
Public Service Announcement
ပြည်သူများ၏ ထောက်ပံကူညီမှုဖြင့်ဆင်ထားခဲ့သောမိုင်းနှင့်တောလမ်းကျွမ်းကျင်မှုတို့ကြောင့်ရဲဘော်အားလုံးအသက်ဘေးနှင့် လွတ်ခဲ့ရပြီး မကြာမီ ပြန်လည်တိုက်စစ်ဆင်မည်ဟု ထုတ်ပြန်ချက်တွင် ပါရှိသည်။
အကြမ်းဖက်စစ်ကောင်စီ၏ သာလွန်အင်အားဖြင့် ဝင်ရောက်စီးနင်းခံရသော မင်းကင်း PDFနှင့်
MDF Special Forces တို့သည့် ချင်းတွင်းမြစ်ရိုးတစ်လျှောက်ရှိ စစ်ကောင်စီ၏ ထောက်ပံ့ရေးလမ်းကြောင်းကို အဓိက တိုက်ခိုက်မှုများပြုလုပ်ထားသောအဖွဲ့ ဖြစ်သည်။
