ကော့ကရိတ်တွင် တိုက်ပွဲဖြစ်ပြီး စစ်ကောင်စီတပ်၏ လက်နက်ခဲယမ်းအချို့ရဟု KNUပြော၊ စစ်ကောင်စီတပ်မှ ထိခိုက်မှုရှိနိုင်ဟုဆို

ကရင်အမျိုးသားအစည်းအရုံး(KNU) တပ်မဟာ(၆)နယ်မြေ ကော့ကရိတ်မြို့နယ်တွင် တိုက်ပွဲဖြစ်ပွားပြီး စစ်ကောင်စီတပ်၏ လက်နက်ခဲယမ်းအချို့ရရှိခဲ့သည်ဟု KNU မှ သတင်းရင်းမြစ်တစ်ဦးက ပြောသည်။

ကော့ကရိတ်မြို့နယ် တွင် ယမန်နေ့(ဒီဇင်ဘာ ၃၁ရက်)က ဖြစ်ပွားသည့် တိုက်ပွဲ၌ KNU ဦးဆောင်သည့် ပူးပေါင်းတပ်ဖွဲ့မှ စစ်ကောင်စီတပ်၏ လက်နက်ခဲယမ်းများ သိမ်းဆည်းရမိကြောင်း ကရင်သတင်းဌာန KICက ဓာတ်ပုံများနှင့်အတူ ဖော်ပြခဲ့သည်။

ယင်းနှင့်ပတ်သက်ပြီး KNU သတင်းရင်းမြစ်တစ်ဦးက “တိုက်ပွဲဖြစ်တာကြားတယ်။ လက်နက်ခဲယမ်းတချို့တော့ ရတယ်” ဟု အတည်ပြုသည်။

KNU လက်အောက်ခံ ကရင်အမျိုးသားလွတ်မြောက်ရေးတပ်မတော်(KNLA) တပ်ရင်း(၂)နှင့် တိုက်ပွဲဖြစ်ခဲ့ပြီး စစ်ကောင်စီတပ်ဘက်မှ ထိခိုက်မှု ရှိနိုင်ကြောင်း အသေးစိတ် မသိရသေးကြောင်း ၎င်းကဆိုသည်။

Public Service Announcement

“အခုက ပြောက်ကျားနည်းနဲ့ပဲ။ ခံစစ်တော့ မလုပ်တော့ဘဲ ပြောက်ကျားစနစ်နဲ့ပဲ တိုက်တာ”ဟု KNU သတင်းရင်းမြစ်က ပြောသည်။

စစ်​ကောင်စီတပ်မှာ KNU တပ်မဟာ ၆ နယ်​မြေဖြစ်​သော ​ကော့ကရိတ်မြို့သို့ ဒီဇင်ဘာ ၂၉ ရက်ညတွင် အင်အား ၁၀၀ ​ကျော်ဖြင့်စစ်​ကြောင်းထိုးလာပြီး ဒီဇင်ဘာ ၃၀ ရက်မနက်မှစ၍တိုက်ပွဲဖြစ်ရာ ဒီဇင်ဘာ ၃၁ ရက်ညအထိ့ ၂ ရက်ဆက်တိုက်ပွဲဖြစ်ခဲ့​ကြောင်း တိုက်ပွဲတွင်ပါဝင်တိုက်ခိုက်ခဲ့​သောတပ်ဖွဲ့ဝင်တစ်ဦးက​ပြောသည်။စစ်​ကောင်စီတပ်မှာ အထိ့နာသဖြင့် ယ​နေ့ (ဇန်နဝါရီ ၁) နံနက်တွင် ဆုတ်ခွာသွားသည်ဟုထင်​ကြောင်း အဆိုပါတပ်ဖွဲ့ဝင်က တိုက်ပွဲအ​ကြောင်းရှင်းပြသည်။

ဒီဇင်ဘာအတွင်းကလည်း KNU ဦးဆောင်သည့် ပူးပေါင်းအဖွဲ့သည် တပ်မဟာ(၆)နယ်မြေ လေးကေ့ကော် ဒေသတွင် စစ်ကောင်စီတပ်ဖွဲ့ဝင်များကို လက်နက်ခဲယမ်းများနှင့်အတူ အရှင်ဖမ်းဆီးရမိခဲ့သည်။ ဒီဇင်ဘာလလယ်တွင် စစ်ကောင်စီတပ်ဖွဲ့ဝင် ၆ဦး၊ ၎င်း၏ လက်အောက်ခံ နယ်ခြားစောင့်တပ်မှ ၂ဦး စုစုပေါင်း ၈ဦး ဖမ်းဆီးရမိခဲ့ပြီး ဒီဇင်ဘာလကုန်ပိုင်းတွင် အရာရှိ အပါအဝင် စစ်ကောင်စီတပ်ဖွဲ့ဝင် ၇ဦးကို ဖမ်းဆီးရမိခဲ့သည်။
ဓာတ်ပုံ – KIC