ကရင်ပြည်နယ် လေးကေကော်မြို့သစ်တွင် ဖမ်းဆီးခံရသည့် မြောင်းမြမြို့နယ်လွှတ်တော်ကိုယ်စားလှယ် ဦးဝေလင်းအောင် ကျဆုံးသွားပြီဆိုသောသတင်းမှာ သတင်းအမှားသာဖြစ်ကြောင်း အမျိုးသားညီညွတ်ရေးအစိုးရ (NUG) ကာကွယ်ရေးဝန်ကြီးဌာနမှ တာဝန်ရှိသူတစ်ဦးက လူထုနွေဦးသို့ အတည်ပြုသည်။
အမျိုးသားညီညွတ်ရေးအတိုင်ပင်ခံကောင်စီ(NUCC)မှ တာဝန်ရှိသူတစ်ဦးကလည်း အဆိုပါ သတင်းမှာ သတင်းအမှားသာဖြစ်ပြီး ယနေ့တွင် ပြည်သူများကြား သွေးကွဲမှုဖြစ်စေရန် သတင်းအမှားများ ဆက်တိုက် ထွက်ပေါ်နေသည်ဟု ပြောသည်။
လွှတ်တော်အမတ် ကိုဝေလင်းအောင်နှင့် အဖမ်းဆီးခံသုံးဦးသည် မြဝတီရဲစခန်းရှိ စစ်ကြောရေးစခန်းတွင် ကျဆုံးသွားကြောင်း လူမှုကွန်ရက်တွင် သတင်းအမှားများထွက်ပေါ်နေခြင်း ဖြစ်သည်။
ပြီးခဲ့သည့် ဒီဇင်ဘာ ၁၄ရက်က ကရင်အမျိုးသားအစည်းအရုံး (KNU)တပ်မဟာ (၆) လှုပ်ရှားမှုနယ်မြေရှိ လေးကေ့ကော်မြို့သစ်တွင် စစ်ကောင်စီတပ်က အင်အားအလုံးအရင်းဖြင့် ရှာဖွေဖမ်းဆီးမှုများ ပြုလုပ်ခဲ့ရာ မြောင်းမြမြို့နယ် ပြည်သူ့လွှတ်တော်ကိုယ်စားလှယ် ဦးဝေလင်းအောင် အပါအဝင် ၃၂ ဦး ဖမ်းဆီးခံခဲ့ရသည်။
ထို့အပြင် အမျိုးသားညီညွတ်ရေးအစိုးရ(NUG)နှင့် အကြမ်းဖက်စစ်ကောင်စီတို့ ထိုင်းနိုင်ငံ ချင်းမိုင်မြို့တွင် တွေ့ဆုံညှိနှိုင်းသည်ဟူသော သတင်းအမှားများလည်း လူမှုကွန်ရက်၌ ဝါဒဖြန့်မှုများ ယနေ့ပြုလုပ်နေကြသည်။ အဆိုပါ သတင်းမှာလည်း သတင်းအမှားဖြစ်ကြောင်း NUG ကာကွယ်ရေးဝန်ကြီး ဦးရည်မွန်က ဖြေရှင်းတုံ့ပြန်ထားသည်။