တန့်ဆည်မြို့ရှိ နေအိမ်အချို့ကို လိုက်လံချိတ်ပိတ်သည့် စစ်ကောင်စီတပ်သားများ မိုင်းမိ၊ ငါးဦးသေဟုဆို

တန့်ဆည်မြို့ပေါ်ရှိ ပြည်သူအချို့၏နေအိမ်များကို လိုက်လံချိတ်ပိတ်နေသည့် စစ်ကောင်စီတပ်နှင့်၎င်း၏ လက်ဝေခံများအား မိုင်းခွဲတိုက်ခိုက်ရာ ငါးဦးသေဆုံးကြောင်း တန့်ဆည်ဖီးနစ်မြို့ပြပျောက်ကြားတပ်ဖွဲ့က ယနေ့(ဇန်နဝါရီ ၁) ထုတ်ပြန်သည်။

ယနေ့ညနေ ၃ နာရီခန့်တွင် တန့်ဆည်မြို့ မြေစာရင်းရုံးတောင်ဘက်(မြို့ပါတ်လမ်းခွဲ)အနီး ပြည်သူပိုင်အိမ်များကို လိုက်လံချိတ်ပိတ်နေသော စစ်ကောင်စီတပ်နှင့် အပေါင်းအပါများကို မိုင်းခွဲတိုက်ခိုက်ခဲ့ခြင်းဖြစ်သည်ဟု ထုတ်ပြန် ချက်တွင် ဖော်ပြသည်။

“ယုတ်မာနေကြသော စခများကို မိမိတို့ ‘တန့်ဆည်ဖီးနစ်’(Phoenix Defence Force – Taze) မှ ‘အုန်း’ပြီး ‘ပြည်သူများအတွက် နှစ်သစ်အဖွင့်လက်ဆောင်’လုပ်ပေးခဲ့ပါသည်”ဟု ထုတ်ပြန်ချက်က ဆိုသည်။

အဆိုပါတိုက်ခိုက်မှုကြောင့် စစ်ကောင်စီဘက်မှ ငါးဦးသေဆုံးပြီး အထိအခိုက်အပျက်အစီးများသည်ဟု ကနဦးသိရကြောင်း တန့်ဆည်ဖီးနစ် မြို့ပြပျောက်ကြားတပ်၏ ထုတ်ပြန်ချက်တွင် ပါရှိသည်။

Public Service Announcement

အကြမ်းဖက်စစ်ကောင်စီသည် တန့်ဆည်မြို့ မေတ္တာမြိုင်ရပ်ကွက်အပါအဝင် မြို့ခံများဖြစ်သည့် ကိုထွန်းဦး၊ ကိုဇင်မိုးအောင်၊ ‌အေးကျော်၊အောင်မျိုးသင်း(ခ)ငမျိုးနှင့် ကိုလှိုင်စိုးစသူတို့၏ နေအိမ်များကို ချိတ်ပိတ်ခဲ့ခြင်းဖြစ် ကြောင်း ဒေသခံများက ပြောသည်။