ထားဝယ်-​မေတ္တာလမ်းတွင် စစ်​ကောင်စီယာဥ်တန်းကိုမိုင်းဆွဲ တိုက်ခိုက်

ထားဝယ်မြို့နှင့် ထိုင်းနယ်စပ်ကိုဆက်သွယ်ထားသည့်ထားဝယ်-မေတ္တာလမ်းတွင် အာဏာသိမ်းစစ်ကောင်စီယာဉ်တန်းကို ဒေသခံကာကွယ်ရေးတပ်ဖွဲ့များကို ဇန်နဝါရီ ၁ ရက်တွင် မိုင်းဆွဲတိုက်ခိုက်ခဲ့​ကြောင်း ဒေသခံများက ပြောသည်။

အဆိုပါမိုင်းခွဲတိုက်ခိုက်မူကို တနင်္သာရီတိုင်း၊ ထားဝယ်မြို့အရှေ့ဘက်ခြမ်း ဝကုန်းရွာနှင့် သင်္ကန်းတုံးကျေးရွာနှစ်ခုကြားတွင် ဇန်နဝါရီ ၁ ရက်ည ၉နာရီခန့်က တိုက်ခိုက်ခဲ့ခြင်းဖြစ်သည်ဟု သိရသည်။

ထိုတိုက်ခိုက်မူကြောင့် အကြမ်းဖက်စစ်ကောင်စီယာဉ်တန်းကို ထိခိုက်ခဲ့သော်လည်း ထိခိုက်သေဆုံးမှုအ​ခြေအ​နေကို မူမသိရှိရ​သေးကြောင်း ဒေသခံများက ပြောသည်။

တိုက်ခိုက်ခံရပြီး​နောက်ကျေးရွာများထဲသို့ စစ်ကောင်စီတပ်သားများက လက်နက်ကြီး၊ လက်နက်ငယ်များဖြင့် ရမ်းသမ်းပစ်ခတ်ခဲ့သည်ဟု ဒေသခံများက ပြောသည်။

Public Service Announcement

ဒီဇင်ဘာ ၁၁ ရက်တွင် အဆိုပါနေရာအနီးတွင်လည်း အကြမ်းဖက်စစ်ကောင်စီယာဉ်တန်းကို မိုင်းဆွဲတိုက်ခိုက်ခဲ့သေးသည်။

အကြမ်းဖက်စစ်ကောင်စီတပ်က ထားဝယ်မြို့နှင့် ထိုင်းနိုင်ငံကို ဆက်သွယ်ထားသည့် ထားဝယ်-မေတ္တာလမ်းပိုင်းရှိ ကျေးရွာများတွင် အခြေချတပ်ဆွဲမူများကို ဒီဇင်ဘာ ၂၆ ရက်က စတင်ဆောင်ရွက်​နေသည်။

ရမ္မဇူ၊ သရက်ငုတ်၊ လိပ်ကြယ်ပြောင်၊ သင်္ကန်းတုံးနှင့် ဝကုန်ကျေးရွာများတွင် စစ်ကောင်စီတပ် စုစုပေါင်း အင်အား ၂၀၀ခန့်က အခိုင်အမာတပ်စွဲထားခြင်းဖြစ်သည်ဟု ဒေသခံများထံမှသိရသည်။ ဒီဇင်ဘာ ၂၈ ရက်တွင် ကျေးရွာများအတွင်း အကြမ်းဖက်စစ်ကောင်စီက စစ်ကြောင်းများဖြင့် ကင်းလှည့်ခဲ့သည်ဟုလည်း ဒေသခံများက​ ပြောသည်။