စစ်ကောင်စီလေကြောင်းမှ ဗုံးကြဲ၍ ဒဏ်ရာရခဲ့သည့် မိုးတားဒေသခံ ၁၀ဦးခန့်တွင် ကလေးငယ်နှစ်ဦးပါဝင်

▪️မပေါက်ကွဲသေးသည့် ဗုံး ၅လုံးကျန်နေ

အာဏာသိမ်းစစ်ကောင်စီတပ်က စစ်ကိုင်းတိုင်း ကသာမြို့နယ် မိုးတားကြီးရွာသို့ တိုက်လေယာဉ်ဖြင့် ဗုံးကြဲခဲ့ရာ ဒေသခံ ပြည်သူ၁၀ထက် မနည်းထိခိုက် ဒဏ်ရာရရှိခဲ့ကြောင်း Katharevolution –IR က ထုတ်ပြန်သည်။

ယနေ့ (ဇန်နဝါရီ ၁၂ရက်) နေ့လယ်ပိုင်းတွင် စစ်ကောင်စီတပ်က တိုက်လေယာဉ် သုံးစီးဖြင့် မိုးတားကြီးရွာကို ပစ်ခတ်ဗုံးကြဲခဲ့၍ အရပ်သားနေအိမ်၁၀လုံးခန့် မီးလောင်ပျက်ဆီးခဲ့ပြီး စပါးဂိုဒေါင်များ၊ စပါးကျီများ မီးလောင်ခဲ့ကြောင်း ဖော်ပြထားသည်။ စပါးများစွာ ဆုံးရှုံးခဲ့ရသည်ဟုဆိုသည်။

မိုးတားကြီးအထက်တန်းကျောင်းအနီးရှိ ကျူရှင်စာသင်ဆောင်မှ စာအုပ်များစွာမီးလောင်ခဲ့ကြောင်း၊ အရပ်သား ပြည်သူ ၁၀ဦးထက်မနည်း ထိခိုက်မိပြီး အသက်အန္တရာယ် စိုးရိမ်ရမှုများရှိခဲ့ကြောင်း၊ ဒဏ်ရာရသူများအနက် အသက် (၆)နှစ်နှင့် (၇)နှစ်အရွယ် ကလေးငယ် နှစ်ဦးလည်း ပါဝင်ကြောင်းထုတ်ပြန်ခဲ့သည်။

Public Service Announcement

ထို့ပြင် ကျေးရွာအတွင်း၌ မပေါက်ကွဲသေးသည့် ဗုံးငါးလုံးကျန်ခဲ့၍ ဗုံးငါးလုံးကိုလည်း ရှင်းလင်းနိုင်ရန် ဆောင်ရွက်နေသည်ဟုဆိုသည်။