အာဏာသိမ်းမှု​ကြောင့် ရန်ကုန်စ​တော့အိတ်ချိန်းတွင် ရှယ်ယာအ​ရောင်းအဝယ်စံချိန်တင်ကျဆင်း၊ ကုမ္ပဏီများအရှုံး​ပေါ်

စစ်တပ်အာဏာသိမ်းထားမူကြောင့် ရန်ကုန်စတော့အိတ်ချိန်းတွင် ရှယ်ယာအရောင်းအဝယ် စံချိန်တင်ကျဆင်းခဲ့ပြီး စာရင်းဝင် ကုမ္ပဏီအများစုလည်း လုပ်ငန်းများအရှုံးပေါ်ကြောင်း ရန်ကုန်စတော့အိတ်ချိန်းက ထုတ်ပြန်သောစာရင်းများတွင်ဖော်ပြထားသည်။

ရှယ်ယာအရောင်းအဝယ်သည် ရန်ကုန်စတော့ အိတ်ချိန်းစတင်ဖွင့်လှစ်ခဲ့သည့် ခြောက်နှစ်အတွင်း ၂၀၂၁ ခုနှစ်တွင် စံချိန်တင်ကျဆင်းပြီး တစ်နှစ်လုံးရှယ်ယာအရောင်းအဝယ်သည် ကျပ် ၄ ဘီလီယံသာရှိခဲ့သည်ဟု ရန်ကုန်စတော့အိတ်ချိန်းတွင် ထုတ်ပြန်သောစာရင်း၊ဇယားများအရသိ့ရသည်။

ထိုပမာဏသည် ရန်ကုန်စတော့အိတ်ချိန်းစတင်ခဲ့သည့် ၂၀၁၆ ခုနှစ်ဖြင့် နှိုင်းယှဉ်ပါက ၁၇ ဆကျော် လျော့နည်းခဲ့ခြင်းဖြစ်ပြီး ကိုဗစ်ကာလရောဂါဖြစ်သည့် ၂၀၂၀ ပြည့်နှစ် နှိုင်းယှဉ်ပါက အနည်းဆုံး ၃ ဆကျော်လျော့ကျသွားခြင်းဖြစ်သည်။

၂၀၁၆ခုနှစ်တွင် ရှယ်ယာအရောင်းအဝယ်သည် ကျပ် ဘီလီယံ ၇၀ကျော်နှင့် ၂၀၂၀ တွင်ကျပ်၁၂ဘီလီယံကျော်အရောင်းအဝယ်ဖြစ်ခဲ့သည်။

Public Service Announcement

ရန်ကုန်စတော့အိတ်ချိန်းတွင်ရှယ်ယာ အရောင်းအဝယ်ကျဆင်းခြင်းအပြင် စာရင်းဝင်ထားသည့် ကုမ္ပဏီများတွင်လည်း အရှုံးပေါ်ခြင်းနှင့်ဝင်ငွေအဆမတန်လျော့ကျခြင်းတို့ဖြစ်ခဲ့သည်ဟု ကုမ္ပဏီများက ထုတ်ပြန်သော နှစ်ပတ်လည်အစီရင်ခံစာများတွင်ဖော်ပြထားသည်။

“COVID-19 ရောဂါက လူတိုင်းအပေါ် ထိခိုက်စေပါတယ်၊ ကူးစက်ရောဂါက နိုင်ငံအတွက်နှောက်ယှက်မူများစွာ အပြင်ဆိုးရွားတဲ့ စိတ်ဖိစီးမှုကိုလည်း ဖြစ်ပေါ်စေခဲ့ပါတယ်၊နောက်ထပ်စိန်ခေါ်မူတစ်ရပ်အနေနဲ့က ကျွန်တော်တို့ရဲ့ စီးပွားရေးလုပ်ငန်းတွေကို လက်ရှိနိုင်ငံရေးအခြေအနေမှာ ဆက်လက်ရပ်တည်နိုင်အောင် ကြိုးစားနေရခြင်းဖြစ်ပါတယ်”ဟု ရန်ကုန်စတော့အိတ်ချိန်းစာရင်းဝင် FMI ကုမ္ပဏီ ဥက္ကဌ ဦးသိမ်းဝေကကုမ္ပဏီနှစ်ပတ်လည်အစီရင်ခံစာတွေ ပြောခဲ့သည်။

FMIကုမ္ပဏီသည် ၂၀၂၁တွင် ဝင်ငွေ ကျပ်ဘီလီယံ ၃၀၀ကျော်ရှိခဲ့သော်လည်း ၂၀၂၀ နှစ်ဖြင့် နှိုင်းယှဉ်ပါကဝင်ငွေ၉ ဒသမ ၃ ရာခိုင်နှုန်းလျော့ကျခဲ့သည်ဟု ဦးသိမ်းဝေကဆိုသည်။ လက်ရှိဖြစ်ပေါ်နေသော စိန်ခေါ်မူများကြောင့် ယခုနှစ်တွင် အမြတ်ငွေ ပေးနိုင်မည်မဟုတ်ကြောင်းလည်း ၎င်းကဆက်​ပြောသည်။

ရန်ကုန်စတော့အိတ်ချိန်းစာရင်းဝင် တယ်လီကွန်းကုမ္ပဏီတစ်ခုဖြစ်သည့် TMHကုမ္ပဏီကလည်း ယခုနှစ်တွင်ဝင်ငွေ ကျပ် ၃ ဘီလီယံရှိခဲ့ပြီး မနှစ်ဖြင့် နှိုင်းယှဉ်ပါက ၄၇ ရာခိုင်နှုန်းလျော့နည်းခဲ့သည်ဆိုသည်။ ထိုကြောင့် ယခုနှစ်တွင် ကုမ္ပဏီက ကျပ် သိန်း ၇၀၀၀ အရှုံးပေါ်ခဲ့ရသည်ဟုသိ့ရသည်။

ယခုနှစ်အတွင်း ရန်ကုန်စတော့အိတ်ချိန်းတွင် စာရင်းဝင်ခဲ့သည့် ခရီးသွားလုပ်ငန်းကုမ္ပဏီ Amata သည်လည်း ယခုနှစ်တွင် ရငွေ ကျပ်တစ်ဘီလီယံခွဲသာရှိပြီးအရှုံးပေါ်ခဲ့သည်ဟုဆိုသည်။ ယခင်နှစ်ကဝင်​ငွေ ကျပ် ၁၀ ဘီလီယံကျော်ရှိခဲ့သည်ဟု ထုတ်ပြန်ထားသည်။

ရန်ကုန်စတော့အိတ်ချိန်းဝင် ဘဏ်ကုမ္ပဏီနှစ်ခုဖြစ်သည့် ပထမပုဂ္ဂလိဘဏ်(First Myanmar Private Bank )နှင့် မြန်မာနိုင်ငံသားများဘဏ်( Myanmar Citizen Bank)တို့မှာလည်းအမြတ်များရရှိခဲ့သော်လည်း အစုရှယ်ယာရှင်များ အမြတ်ခွဲဝေမပေးနိုင်ဟုဆိုသည်။

မြန်မာနိုင်ငံသားများဘဏ်-MCBက ရလမ်းမရှိသော ၊ ရရန် မသေချာသော ချေးငွေ (Non Performing Loan)များသည် ချေးငွေစုစုပေါင်း၏ ၅ ရာခိုင်နှုန်းအထက်ရှိနေသောကြောင့် အမြတ်ခွဲဝေမပေးနိုင်ဟုရှင်းလင်းထားသည်။

ပထမပုဂ္ဂလိကဘဏ်-FPBဘဏ်ကလည်း ရရန်မသေချာသောချေးငွေများသည် ၂၀၂၀ စက်တင်ဘာတွင် ၈ ရာခိုင်နှုန်းကျော်သာရှိခဲ့ရာမှ ၂၀၂၁ စက်တင်ဘာတွင် ၁၇ ဒသမ ၇ ရာခိုင်နှုန်းအထိ မြင့်တက်လာခြင်းကြောင့် အမြတ်ငွေထုတ်မပေးနိုင်ခြင်းဖြစ်သည်ဟု ရှယ်ယာရှင်များကို ရှင်းလင်းထားသည်။

သီလဝါအထူးစီးပွားရေးဇုန်ကို မြန်မာဘက်မှ ရှယ်ယာပါဝင်ထားသည့် မြန်မာသီလဝါSEZကုမ္ပဏီက ရှယ်ယာတစုကို ကျပ် ၁၀၀ ပေးမည်ဟု ထုတ်ပြန်ကြေညာခဲ့သည်။ ၎င်းကုမ္ပဏီသည် ကိုဗစ်ဖြစ်ပွားခဲ့သည့် ၂၀၂၀ခုနှစ်တွင်ပင်ရှယ်ယာတစ်စုလျှင် ၁၈၀ကျပ်ထုတ်ပေးခဲ့သည်။အကြမ်းဖက်
စစ်​ကောင်စီအာဏာသိမ်းထား​​သောနှစ်တွင် အစုရှယ်ယာအမြတ်ငွေ ၄၅ ရာခိုင်နှုန်းခန့်လျော့ကျသွားခြင်းဖြစ်သည်။

စစ်အာဏာသိမ်းမှုနှင့် ကမ္ဘာကပ်​ရောဂါ​ကြောင့် မြန်မာ့စီးပွား​ရေးသည် ၂၀၂၀-၂၀၂၁ (၂၀၂၀ ​အောက်တိုဘာမှ ၂၀၂၁ စက်တင်ဘာလကုန်အထိ့)တွင် ၁၈ ရာခိုင်နှူန်းကျဆင်းမည်ဟု ကမ္ဘာဘဏ်ကခန့်မှန်းခဲ့သည်။ စစ်အာဏာသိမ်းမှု မဖြစ်ခဲ့လျှင် တိုင်ပြည်စီးပွား​ရေး ရှိနိုင်​သော အ​ခြေအ​နေမှ ၃၀ ရာခိုင်နှုန်း ​လျော့ကျသွားခြင်းဖြစ်သည်။ပြည်သူများ၏အလုပ်အကိုင်​ပေါင်းတစ်သန်း​ကျော်ဆုံးရှုံးမည်ဟုလည်း ကမ္ဘာဘဏ်ကတွက်ချက်ခန့်မှန်းခဲ့သည်။