'/%3E%3C/svg%3E){kind=small}
ကရင်ပြည်နယ် ကော့ကရိတ်မြို့နယ်တွင် ယနေ့နံနက်က တိုက်ပွဲဆက်လက်ဖြစ်ပွားခဲ့ရာ စစ်ကောင်စီတပ်က စစ်ရဟတ်ယာဉ်နှစ်စီးဖြင့် လာရောက်တိုက်ခိုက်ခဲ့ကြောင်း ဒေသခံက ပြောသည်။
“မနက်ပိုင်းကတော့ တိုက်ပွဲ နည်းနည်းဖြစ်တယ်။ ထိပ်တိုက်တွေ့ဆုံမှုတွေဖြစ်မယ်လို့ထင်တာပဲ။ မကြာခင်မှာပဲ ၁၂နာရီ လောက်မှာတေ့ာ လာပစ်သွားတာပေါ့။ ကျွန်တော်လည်း နာရီ မကြည့်အားတော့ဘူး ထွက်ပြေးနေတာဆိုတော့”ဟု ၎င်းက ဆိုသည်။
စစ်ကောင်စီတပ်သည် ကရင်အမျိုးသားအစည်းအရုံး(KNU) ထိန်းချုပ်နယ်မြေသို့ ဝင်ရောက်နေရာယူခြင်းကြောင့် ယမန်နေ့ ဇန်နဝါရီ ၁၄ရက်က ကော့ကရိတ်မြို့အနီး တိုက်ပွဲဖြစ်ခဲ့ရာ စစ်ကောင်စီတပ်မှ ၃ဦးသေ၊ ၄ဦးဒဏ်ရာရခဲ့သည်။ ယမန်နေ့ညပိုင်းက စစ်ကောင်စီတပ်က လက်နက်ကြီး ပစ်ခတ်၍ ဒေသခံများ၏ နေအိမ်အချို့ ထိခိုက်ပျက်စီးခဲ့သည်။
ယနေ့လေကြောင်းတိုက်ခိုက်မှုတွင် ဒေသခံများ ထိခိုက်မှုအခြေအနေကို မကြားမိသေးကြောင်း ကော့ကရိတ်ဒေသခံက ပြောသည်။
Public Service Announcement
“ဒီနေ့က ကော့ကရိတ်မြို့ပေါ် မဟုတ်ဘူး။ ကော့နွယ်အုပ်စုမှာ။ ကော့နွယ်အုပ်စုဆိုတော့ မြို့ဟောင်းပါမယ် နောက်ပြီး မောင်းမရွာသစ်အုပ်စုပါမယ်။ အဲဒီ မှာ ဘုန်းကြီးကျောင်းနားတစ်၀ိုက်ပေါ့နော်။ တစ်မိုင်ကုန်းအထိကို ဖြစ်နေတာ။မနက်က တိုက်ပွဲဖြစ်တာလည်း အဲဒီနားမှာပဲ။ တိုက်ပွဲဖြစ်တဲ့နားမှာ လေကြောင်းက ထပ်ပြန်ပစ်တာ”ဟု ၎င်းက ဆိုသည်။
စစ်ကောင်စီတပ်သည် ကရင်၊ ကချင်၊ ကရင်နီ၊ ချင်း ၊ စစ်ကိုင်း၊ မကွေး နှင့် ရှမ်းမြောက် မုံးကိုးဒေသများ၌ ဖြစ်ပွားနေသည့် တိုက်ပွဲများတွင် လေကြောင်းတိုက်ခိုက်မှုများ ဆက်တိုက်အသုံးပြုလာနေသည်။
