ချင်းပြည်နယ် တီးတိန်မြို့နယ်ရှိ ကလေး-သိုင်းငင်းလမ်းတွင် အကြမ်းဖက်စစ်ကောင်စီတပ်နှင့် ဒေသခံပြည်သူ့ကာကွယ်ရေးအဖွဲ့များကြား သုံးရက်ဆက်တိုက်ပွဲဖြစ်ပွားနေပြီး စစ်ကောင်စီဘက်မှ အကျအရှုံးများလာ၍လက်နက်ကြီးနှင့် လေကြောင်းပစ်ကူယူကာ တိုက်ခိုက်နေကြောင်း ဒေသခံကာကွယ်ရေးတပ်ဖွဲ့တစ်ခုဖြစ်သည့် CDM- Siyin အဖွဲ့က သတင်းထုတ်ပြန်သည်။
အထိနာနေသည့် အကြမ်းဖက်စစ်ကောင်တပ်များက ယနေ့ နံနက် ၁၀ နာရီမှစ၍ ကလေးတက္ကသိုလ်အတွင်းမှ လက်နက်ကြီးများဖြင့်ပစ်ကူပေးပြီး ၊တိုက်လေယာဉ်နှစ်စင်းဖြင့်ပါ ဗုံးများဆက်တိုက်ကျဲသဖြင့် တိုက်ပွဲပြင်းထန်နေသည်ဟု ထုတ်ပြန်ချက်တွင် ပါရှိသည်။
အကြမ်းဖက်စစ်ကောင်စီဘက်က တိုက်လေယာဉ်နှစ်စီးဖြင့် လာရောက်ဗုံးကျဲတိုက်ခိုက်ခဲ့သော်လည်း ချင်းတောင်တွင် မိုးရွာပြီးမြူများဆိုင်းနေသောကြောင့် အကြမ်းဖက်စစ်ကောင်စီက လေယာဉ်များ စိတ်တိုင်းကျဲ ဗုံးမကျဲနိုင်ပြန်လှည့်ပြန်ခဲ့ရသည်ဟု ဒေသခံတစ်ဦးကပြောသည်။
“လေယာဉ်တွေနဲ့ ပစ်တာ အသံအကျယ်ကြီးကြားနေရတယ်။”ဟု ဒေသခံတစ်ဦးက ပြောသည်။
တိုက်ပွဲတွင်အကြမ်းဖက်စစ်ကောင်စီဘက်မှသေဆုံး၊ဒဏ်ရာရရှိမှုများသော်လည်း အရေအတွက်အတိအကျကိုမူ အတည်မပြုနိုင်သေးကြောင်း CDM- Siyinကဆိုသည်။ ယနေ့တိုက်ပွဲတွင်စစ်ကောင်စီတပ်မှ သေဆုံးသွားသူ ၂ ဦး၏ ရုပ်အလောင်းကို ဆွဲယူသွားကြောင်းလည်းဒေသခံများထံမှ သိ့ရသည်။ထို့အပြင်ပြည်သူ့ကာကွယ်ရေးတပ်ဖွဲ့ဘက်မှလည်း တပ်ဖွဲ့ဝင် ၇ ဦးဒဏ်ရာရရှိထားကြောင်းလည်းထုတ်ပြန်ချက်တွင်ပါရှိသည်။
ကလေးမြို့မှ ချင်းတောင်ဘက်ကို တက်လာသည့် အကြမ်းဖက်စစ်ကောင်စီတပ်များကို တီးတိန်မြို့နယ်၊ ဟိန်ဇန်ရွာအလွန်တွင် ဒေသခံကာကွယ်ရေးတပ်များက ဇန်နဝါရီ ၁၃ ရက်မှစ၍ ခုခံတိုက်ခိုက်နေခြင်းဖြစ်သည်။
လက်ရှိတွင် ကလေးမြို့မှ ချင်းတောင်ကိုသွားသည် ၉မိုင်တွင် ခရီးသွားပြည်သူများ ပိတ်မိနေပြီး ဒေသခံများက ကူညီပေးနေရသည်ဟု ဒေသခံတစ်ဦးကပြောသည်။ ဒေသခံကာကွယ်ရေးတပ်များက ကလေးနှင့်ချင်းတောင်ကြားကို ခရီးမသွားကြရန် မေတ္တာရပ်ခံထားသည်။