ထားဝယ်မြို့နယ်အတွင်း စစ်ကောင်စီတပ်နှင့် ဒေသပြည်သူ့ကာကွယ်ရေးတပ်ဖွဲ့(LPDF)များကြား တိုက်ပွဲများပြင်းထန်လျက်ရှိကြောင်း ဒေသခံများက ပြောသည်။
ယမန်နေ့(ဇန်နဝါရီ ၁၉)နံနက်ပိုင်းကတည်းက ထားဝယ်မြို့နယ် ခေါင်တိုင်ပြင်ကျေးရွာအနီး ထိတွေ့တိုက်ပွဲများစတင်ဖြစ်ပွားခဲ့ပြီး ယနေ့တွင်လည်း မြင်းမတ်တပ်ကျေးရွာအနီး တိုက်ပွဲများ ဆက်လက်ဖြစ်ပွားနေကြောင်း ၎င်းတို့က ဆိုသည်။
“နံနက်(၉)နာရီအချိန်တွင် မြင်းမတ်တပ်ရွာမှနေ၍ လက်နက်ကြီး၊ ငယ်ဖြင့် ပစ်ခတ်မှုကြောင့် မြင်းမတ်တပ်ရွာသားများစွာ ထွက်ပြေးခဲ့ရတယ်။ ထို့နောက် PDFများနှင့် တိုက်ပွဲစတင်ဖြစ်ပွားခဲ့ပြီး ယနေ့(ဇန်နဝါရီ ၂၀)အချိန်ထိတိုက်ပွဲပြင်းထန်လျက်ရှိပါတယ်”ဟု ထားဝယ်ခရိုင်လူထုလှုပ်ရှားမှုဦးဆောင်သူတစ်ဦးက ပြောသည်။
ယနေ့ဖြစ်ပွားသည့် မြင်းမတ်တပ်ရွာတိုက်ပွဲသည် တနသ်ာရီတိုင်းအတွင်း စစ်ကောင်စီတပ်နှင့် ဒေသကာကွယ်ရေးတပ်ဖွဲ့များကြား အချိန်ပြည့်နီးပါးနှင့် ရက်ဆက်တိုက်ပွဲဖြစ်သည့် ပထမဆုံးတိုက်ပွဲလည်းဖြစ်ကြောင်း ၎င်းက ဆက်ပြောသည်။
Public Service Announcement
ထိတွေ့တိုက်ပွဲများကြောင့် ခေါင်တိုင်ပြင်နှင့် မြင်းမတ်တပ်ကျေးရွာများမှ ဒေသခံအရပ်သားပြည်သူ တစ်ထောင်ကျော်ခန့် ဘေးလွတ်ရာတိမ်းရှောင်နေကြရပြီး နှစ်ဘက်ထိခိုက်သေဆုံးမှုအခြေအနေအား မသိရသေးပေ။
ဇန်နဝါရီ ၁၆ ရက်ကလည်း KNU တပ်မဟာ(၄) ထိန်းချုပ်နယ်မြေဖြစ်သည့်ထားဝယ်-ထီးခီးလမ်းပိုင်း ဝါးတောရွာရှိ စစ်ကောင်စီဂိတ်တစ်ခုကို အမည်မသိလက်နက်ကိုင်တစ်စုမှ ဝင်ရောက်ပစ်ခတ်ခဲ့ရာ စစ်ကောင်စီတပ်ဖွဲ့ဝင်တစ်ဦး သေဆုံးခဲ့သည်။
