●စစ်ကောင်စီနှင့်KNU တပ်မဟာ၄ကြားစစ်ရေးတင်းမာ
တနင်္သာရီတိုင်းတွင် အာဏာသိမ်းစစ်ကောင်စီတပ်မှယမန်နေ့မှစ၍ စစ်ကြောင်းထိုးလာသောကြောင့် ဒေသခံပြည်သူ့ကာကွယ်ရေးတပ်များနှင့်တိုက်ပွဲဖြစ်ပွားနေသည်။ထို့အပြင် အဆိုပါဒေသမှာပင်စစ်ကောင်စီတပ်နှင့်KNU တို့ကြားစစ်ရေးတင်းမာနေကြောင်း ဒေသခံများကပြောသည်။
ထားဝယ်မြို့နယ်၊ မေတ္တာမြို့နယ်ခွဲရှိ မြင်းမတ်တပ်ရွာကို အကြမ်းဖက်စစ်ကောင်စီတပ်များက ဇန်နဝါရီ ၁၉ ရက် နံနက်ပိုင်းကတည်းက စစ်ကြောင်းထိုးဝင်ရောက်မှုကြောင့် ဒေသခံပြည်သူ့ကာကွယ်ရေးတပ်များ နှင့် တိုက်ပွဲများဖြစ်ပွားနေခြင်းဖြစ်သည်။
“စစ်ကောင်စီတပ်တွေ သာလွန်အင်အားတွေနဲ့ ရွာတွေကို စစ်ကြောင်းထိုးနေတာ၊ လက်နက်ကြီးတွေလဲပစ်နေတယ်။ အခုညပိုင်းအထိ ပစ်လိုက်၊နားလိုက်ပစ်နေတယ်”ဟု ဒေသခံတစ်ဦးကပြောသည်။
Public Service Announcement
လက်ရှိတွင် ခေါင်တိုင်ပြင်၊ မြင်းခန်တီ၊ သစ်ကတိုးရွာများကို အင်အား ၃၀၀လောက်ဖြင့် စစ်ကောင်စီတပ်ကစစ်ကြောင်းထိုးနေခြင်းဖြစ်ကြောင်း ၎င်းကဆက်ပြောသည်။ KNU တပ်မဟာ ၄ ကလည်း စစ်ကောင်စီတပ်မှနယ်မြေ ကျော်လွန်ပြီး၎င်းတို့နယ်မြေသို့ဝင်လာပါက ပစ်ခတ်တိုက်ခိုက်ရန် အဆင့်သင့်အနေအထားဖြစ်နေသည်ဟုလည်း ပြည်သူ့ကာကွယ်ရေးတပ်ဖွဲ့များနှင့်နီးစပ်သောဒေသခံကပြောသည်။
ယနေ့မနက်ပိုင်းတွင် နှစ်ဖက် ထိတွေ့တိုက်ပွဲများဖြစ်ပွားနေပြီး နှစ်ဖက်အထိခိုက် မသိရသေးဟု ဒေသခံများထံမှ သိရသည်။ လက်ရှိချိန်တွင် ထားဝယ်မြို့ပေါ်တွင် လူငယ်လူရွယ်များကိုလည်း အကြမ်းဖက်စစ်ကောင်စီက ဖမ်းဆီးမှုများပြုလုပ်နေသည်ဟု ဒေသခံများကပြောသည်။
တနင်္သာရီတိုင်းကို အကြမ်းဖက်စစ်ကောင်စီခေါင်းဆောင်လာရောက်ပြီးနောက် ဒေသခံပြည်သူ့ကာကွယ်ရေးတပ်ဖွဲ့များကို အကြမ်းဖက်စစ်ကောင်စီတပ်က အင်အားသုံးတိုက်ခိုက်နေသည်။
အကြမ်းဖက်စစ်ကောင်စီ စစ်ကြောင်းထိုးရာနေရာများသည် တနင်္သာရီတိုင်းအတွင်းရှိ အကြီးဆုံး သတ္တုတွင်းဖြစ်သည့်ဟန္ဒားသတ္တုတွင်းနှင့် မြန်မာ-ထိုင်း သဘာဝဓာတ်ငွေ့ပိုက်လိုင်းဖြတ်သန်းရာတလျှောက်ရှိကျေးရွာများရှိရာဖြစ်သည်။ သတ္တုတွင်း တည်ရှိရာ မြင်းခန်တီရွာတွင် အကြမ်းဖက်စစ်ကောင်စီကတပ်စွဲထားသည်ဟု ဒေသခံများကပြောသည်။
တိုက်ပွဲများကြောင့်ခေါင်တိုင်ပြင်၊ မြင်းမတပ်၊ ပိန္နဲချောင်း၊ မြေးခန္တီ၊ ဟာမြင်းကြီး ကျေးရွာများမှ ဒေသခံတစ်ထောင်ကျော်မှာလည်း ထွက်ပြေးတိမ်းရှောင်နေရသည်ဟု ဒေသခံများကပြောသည်။
