■အကြမ်းဖက်စစ်ကောင်စီအတွက် ကြီးမားသောဆုံးရှုံးမှုဟု NUG လူအခွင့်အရေးဝန်ကြီးသုံးသပ်
အမေရိကန် စွမ်းအင်ကုမ္ပဏီ Chevron ကော်ပိုရေးရှင်းက မြန်မာနိုင်ငံက ရတနာသဘာဝဓာတ်ငွေ့ တူးဖော်ရေးလုပ်ကွက်မှနှုတ်ထွက်နိုင်ရန် စီမံချက်ချလုပ်ကိုင်နေသည်ဟု ယနေ့ ရိုက်တာသတင်းတွင်ဖော်ပြထားသည်။
“မြန်မာနိုင်ငံရဲ့အခြေအနေအရ ရတနာသဘာဝဓာတ်ငွေ့ စီမံကိန်းအပေါ် အကျိုးစီးပွားကို ပြန်လည်သုံးသပ်ထားပါတယ်။ ဒီနိုင်ငံကနေ ထွက်ဖို့ အစီအစဉ်ချပြီး စနစ်တကျ လွှဲပြောင်းပေးဖို့လုပ်နေပါတယ်”ဟုအမေရိကန်ရေနံကုမ္ပဏီပြောခွင့်ရ ပုဂ္ဂိုလ်က ရိုက်တာသတင်းဌာနသို့ပြောသည်။
အမေရိကန်ကုမ္ပဏီ Chevronနည်းတူ ပြင်သစ်ကုမ္ပဏီ Totalကလည်း မြန်မာပြည်ရှိ စီမံကိန်းများမှ နှုတ်ထွက်ကြောင်းယနေ့ပင် ကြေညာခဲ့သည်။
Public Service Announcement
“ရေနံနဲ့ သဘာဝဓာတ်ငွေ့ရောင်းရငွေတွေကို အိပ်ကပ်ထဲထည့် ကိုယ်ကျိုးအတွက်သုံးပြီး ပြည်သူတွေကို သတ်ဖြတ်ဖို့ လက်နက်တွေဝယ်နေတဲ့ အကြမ်းဖက်စစ်ကောင်စီရဲ့လုပ်ရပ်တွေကြောင့် တိုတယ်နဲ့ ရှဲဗရွန် ရေနံကုမ္ပဏီကြီး နှစ်ခုက မြန်မာပြည်ကနေထွက်ဖို့ ဆုံးဖြတ်လိုက်ပါပြီ။ ဒီငွေတွေကိုမျှော်ကိုးရင်း ပြည်သူတွေအပေါ် စစ်အင်အားနဲ့ခြိမ်းခြောက်ချုပ်ကိုင်ဖို့ကြိုးစားနေတဲ့ အကြမ်းဖက်စစ်ကောင်စီအတွက်တော့ ကြီးမားတဲ့ဆုံးရူံးမှုဖြစ်ပါတယ်။”ဟု အမျိုးသားညီညွတ်မူရေးအစိုးရ(NUG), လူအခွင့်အရေးဝန်ကြီး ဦးအောင်မျိုးမင်းက ၎င်း၏ လူမူကွန်ရက်တွင်ရေးသားခဲ့သည်။
မြန်မာနိုင်ငံတွင် စစ်တပ်က အာဏာသိမ်းပြီးနောက် နိုင်ငံအတွင်း လူအခွင့်အရေးချိုးဖောက်မူများ၊ အပြစ်မဲ့ပြည်သူများကို သတ်ဖြတ်မူကြောင့် စစ်ကောင်စီကို အဓိကငွေကြေးထောက်ပံ့နေသည့် နိုင်ငံတကာရေနံကုမ္ပဏီများကို ပြည်တွင်းမှနှုတ်ထုတ်ရန် လူထုကဆက်တိုက်တောင်းဆိုနေသည်။
